Tashkentte mektep dırektory mılıtsııanyń kózinshe oqýshyny uryp-soqty

<p>Tashkent qalalyq mektepke deıingi jáne mektepte bilim berý basqarmasy mektep dırektorynyń oqýshyny uryp-soǵyp jatqany týraly jelide taraǵan vıdeoǵa qatysty túsinik berdi, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a>.</p>

Vıdeodaǵy derekke súıensek, Tashkent qalasyndaǵy №217 mekteptiń 8-synybynda oqıtyn eki bala kabınette tóbelesip qalǵan. Biri ekinshisiniń betinen judyryqpen uryp, jaraqattaǵan.

Muny bilgen mektep basshylyǵy oqýshylardy dırektordyń kabınetine shaqyrǵan. Mektep dırektory, dırektordyń rýhanı-tárbıe isi jónindegi orynbasary Chılonzor aýdany ishki ister bóliminiń ınspektor-psıhologi, aǵa leıtenanttyń qatysýymen oqýshylarǵa túsindirý jumystaryn júrgizgen. Mektep basshysy balalardyń birin tártipke shaqyrý barysynda oǵan urysyp, uryp-soqqan.

Osydan keıin aýdan ákiminiń orynbasarlary, mektep ákimshiligi, muǵalimder, ІІB qyzmetkerleri men ata-analardyń qatysýymen jıyn ótkeni habarlandy. Qazirgi ýaqytta osy jaǵdaıdy quqyq qorǵaý organdary tekserip jatyr.

«Qurmetti ustazdar! Oqýshylarǵa kúsh qoldaný, onyń ishinde balaǵattaý, uryp-soǵý pedagog etıkasyna sáıkes kelmeıtinin jáne bul úshin bizdiń zańnamada jazalaý sharalary belgilengenin taǵy bir ret eske salamyz. Mundaı keleńsiz jaǵdaı pedagogtiń bedeline nuqsan keltiredi», – delingen habarlamada.