Tashkentte quny 1 mıllıard dollar bolatyn kún batareıalary ornatylady

TAShKENT. QazAqparat - Ózbekstan astanasynda jańartylatyn energııa kózderin engizýge 1 mlrd AQSh dollaryn bólý josparlanýda. Bul týraly Ózbekstan prezıdenti Shavkat Mırzıeev eldegi energııa tapshylyǵy máselesine arnalǵan jıynda aıtty, dep habarlaıdy QazAqparat tilshisi respýblıka basshysynyń baspasóz qyzmetine silteme jasap.

Ózbekstan basshysy Tashkentte elektr energııasy men kógildir otynǵa degen suranys udaıy ósip otyrǵanyn atap ótti. Kórshi elde energııa tapshylyǵy problemalaryn sheshý úshin jańartylatyn energııanyń áleýetin paıdalaný josparlanýda.

Osynyń arqasynda, esepteýler boıynsha, 2023 jyly 240 mln kVt/saǵ kólemindegi energııaǵa kútiletin suranysty 4 eseden astam jabýǵa, 1,08 mlrd kVt/saǵ energııa óndirýge bolady», - dedi Shavkat Mırzıeev.

Ol úshin kópqabatty úılerdiń, áleýmettik nysandardyń, memlekettik jáne jeke kásiporyndardyń, óndiristik aımaqtar men avtoturaqtardyń shatyrlaryna jalpy qýaty 2000 MVt kún batareıalaryn ornatý josparlanýda.

«Qala jańartylatyn energııa kózderin engizýge 1 mıllıard dollar bóledi», - dedi prezıdent.

Budan buryn habarlanǵandaı, Ózbekstanda 2023 jyldan bastap memlekettik mekemeler, sharýashylyq nysandary men sharýashylyqtary kezeń-kezeńimen balamaly energııamen qamtamasyz etýge kóshetin bolady.

Bıylǵy qysta Ózbekstan qatty aıaz kezinde aýqymdy energetıkalyq daǵdarysqa tap boldy. Ózbekstan basshysy qysqa daıyndyqtyń nasharlyǵyna baılanysty birqatar joǵary laýazymdy sheneýnikterdi qyzmetinen bosatty.

Elorda men respýblıkanyń óńirlerindegi aıaz ben kommýnaldyq sharýashylyqtyń jumysyndaǵy kúrdeli máseleler aıasynda áskerı dalalyq ashanalar men jylý pýnktteri iske qosyldy. Turǵyn úı qorynyń energııa tıimdiligin arttyrý maqsatynda Ózbekstan úkimeti 30 myńnan astam kópqabatty úıdi bazalt jabynymen oqshaýlap, balamaly energııa kózderine kóshirýdi kózdep otyr.