Tashkentte koronavırýs órship, naýqastar aýrýhanaǵa syımaı jatyr

TAShKENT. QazAqparat – Koronavırýs ınfektsııasyn juqtyrǵan naýqastar kóbeıip, saldarynan Tashkent aýrýhanalarynda oryn jetispeýde, dep habarlaıdy QazAqparattyń menshikti tilshisi.

Bul týraly «Ózbekstan 24» telearnasyna Birinshi Zeńgiata kópbeıindi aýrýhanasy dırektorynyń orynbasary Olımjon Ishakov aıtty.

«Bizdiń aýrýhana 2 myń adamǵa arnalǵan. Biraq qazir munda 2 550 naýqas em alýda. Koronavırýs juqtyrǵandardyń sany kúrt kóbeıdi, ásirese aıaǵy aýyr áıelder men balalar arasynda. Bloktardaǵy naýqastardyń kóptiginen biz balalardy eresekterge arnalǵan palatalarǵa jatqyzýǵa májbúrmiz. Bul jaǵdaı vaktsınalaýsyz máseleni sheshýge bolmaıtynyn kórsetip otyr», - dedi dáriger.

Onyń aıtýynsha, kúndelikti aýrýhanaǵa shamamen 350 adam túsýde. Bos tósek oryn qalmaǵandyqtan, naýqastardy qabyldaý toqtatyldy.

Osyndaı jaǵdaı ekinshi Zeńgiata kópbeıindi aýrýhanasynda da baıqalady, qazirgi kezde ondaǵy 2 myń tósek orynnyń tek 300-i ǵana bos. Infektsııanyń tez taralyp jatqanyn eskersek, ol da bir-eki kúnde tolmaq.

Eske sala keteıik, Ózbekstanda epıdemıologııalyq ahýaldyń órshýinen 28 maýsymnan bastap karantın kúsheıtildi.

Ózbekstan astanasy eki aptalyq karantınge jabyldy. Tashkentte naýqastardy jatqyzatyn tósek-oryndy kóbeıtý úshin 2 myń oryndyq kovıd ortalyqtary ashylyp jatyr.