Tashkentte qazaq tilinde Abaı jáne Orta Azııa ádebıeti atty monografııa jaryq kórdi

TAShKENT. QazAqparat - Ózbekstanda qazaqtyń uly aqyny Abaıdyń 175 jyldyǵyna oraı Abaı jáne Orta Azııa ádebıeti atty zertteý eńbegi jaryq kórdi, dep habarlaıdy QazAqparat.

Ózbekstannyń Turan ǵylymdar akademııasynyń jáne Qazaqstannyń Gýmanıtarlyq ǵylymdar akademııasynyń akademıgi, professor Qaldybek Seıdanovtyń «Abaı jáne Orta Azııa ádebıeti» atty ǵylymı zertteý eńbeginde qazaqtyń uly aqyny Abaı Qunanbaıuly shyǵarmashylyǵynyń týysqan halyqtar ádebıetine yqpaly, ózbek, qaraqalpaq, túrikmen, qyrǵyz halyqtarynyń bas aqyndarymen ádebı baılanysy zertteledi.

Atap aıtqanda, monografııada Naýaı, Babyr sekildi túrki shaıyrlarynyń Abaıǵa yqpaly, Abaıdyń keńes dáýirindegi týysqan halyqtar aqyndaryna yqpaly sóz bolady.

Abaıdyń 175 jyldyǵyna oraı jaryq kórgen kitap Ózbekstan Jazýshylar odaǵy «Ijod» qory esebinen Tashkenttiń «Adabiyot» baspasynda basyp shyǵaryldy.

Qaldybek Seıdanov 1963 jyldan bastap Qazaqstan men Ózbekstan arasyndaǵy dostyq qarym-qatynastar týraly jazyp keledi. Onyń osy ýaqytqa 745 maqalasy, 22 kitaby jáne «Tańdamaly shyǵarmalar jınaǵy» men «Óleńder» 10 tomdyǵy jaryq kórdi. Ózbekstandaǵy qazaq mektepterinde 5,7,9,10,11 synyptarǵa arnalǵan «Qazaq ádebıeti» oqýlyqtaryn jazdy. Sonymen qatar avtor ýnıversıtetterdiń fılologııa fakýlteti stýdentterine arnalǵan «Áýezov jáne Orta Azııa ádebıeti» (qazaq tilinde, 2006 j.), «Shyńǵys Aıtmatov jáne ózbek ádebıeti» (ózbek tilinde, 1999 j.) jáne «Qazaq ádebıetiniń tarıhy» oqýlyqtaryn shyǵardy.

Ózbekstan táýelsizdiginiń 29 jyldyǵyna oraı Ózbekstan Respýblıkasynyń Prezıdenti Sh.Mırzıeevtiń Jarlyǵymen Qaldybek Seıdanov «Dostyq» ordenimen marapattalǵan.