Tashkentte eki qazaqstandyq boksshy jeńiske jetip, bireýi jeńilip qaldy

TAShKENT. QazAqparat – Ózbekstan astanasy Tashkentte boks keshi ótip, oǵan birqatar qazaqstandyq boksshy qatysty, dep habarlaıdy QazAqparat Sports.kz-ke silteme jasap.

Qazaqstandyq boksshy Ramazan Orynbasaruly (0-1) kásibı mansabyndaǵy ekinshi jekpe-jegin ótkizip, 22 jastaǵy Ózbekstan boksshysy Jasýr Zohıdovpen (3-0, 3 KO) judyryqtasty.
Aıqas jeti raýndqa josparlanǵanymen, alǵashqy úsh mınýtta qazaqstandyq boksshy tahnıkalyq nokaýt aldy. Orynbasaruly aýyr soqqyny ótkizip alyp, kanvasqa qulap ketti. Referı nokdaýn eseptedi, sodan keıin qazaqstandyq boksshynyń buryshy aq oramal tastap, jekpe-jekti jalǵastyrýdan bas tartty.
Taǵy bir qazaqstandyq boksshy Damır Quljabaev kásibı mansabyndaǵy ekinshi jekpe-jegin 20 jastaǵy ózbekstandyq sportshy Afzalbek Bahtıerovqa (0-5) qarsy ótkizdi.
Asa jeńil salmaqtaǵy jekpe-jek tórt raýndqa josparlanǵan bolatyn. Biraq ekinshi raýndtyń sońynda Quljabaev dál soqqy jasap, qarsylasyn kanvasqa jiberdi. Referı sanaýdy bastap edi, qarsylasy esin jıyp, aıqas jalǵasty. Biraq úshinshi raýnd bastalmas buryn Bahtıerovtyń buryshy aıqasty jalǵastyrýdan bas tartatyndaryn málimdedi.
Osylaısha, Daryn Quljabaev kásipqoı bokstaǵy ekinshi jeńisine jetse, Afzalbek Bahtıerov altynshy ret jeńilip qaldy.
Tashkent tórinde judyryqtasqan taǵy bir qazaqstandyq Samat Jetibaev (5-0, 3 KO) kásibı mansabyndaǵy altynshy aıqasyn ótkizdi.
Onyń qarsylasy – 35 jastaǵy ózbek boksshy Shahrıer Isakov (4-2, 4 KO). Jeńil salmaqtaǵy jekpe-jek segiz raýndqa josparlanǵanymen, besinshi raýndta qazaqstandyq boksshy qarsylasyn tehnıkalyq nokaýtqa jiberip, jeńiske jetti.
Samat Jetibaev qatarynan altynshy aıqasynda jeńiske jetip, jeńilmeı kele jatqan bolsa, Shahrıer Isakov úshinshi ret qarsylasyna ese jiberdi.