Tashkentte 2010 jylǵa deıin shyǵarylǵan kólikterdiń júrýine tyıym salynýy múmkin

<p>Ekologııalyq ahýaldy jaqsartý úshin Ózbekstan astanasynda avtokólikterge qatysty birqatar shekteý engizý usynyldy, dep habarlaıdy <a href="Kazinform." target="_blank" rel="noopener">Kazinform</a> agenttiginiń menshikti tilshisi.</p>

Ózbekstan Ekologııa mınıstrliginiń málimetinshe, Tashkenttegi aýanyń lastanýyna aǵashtardy zańsyz kesý, kólikter bóletin zııandy gazdar jáne kómir men mazýt tútini sebep.

«Búginde iri qalalarda, onyń ishinde Tashkentte atmosferalyq aýanyń lastanýy elektr jáne jylý energııasy kózderi, avtokólik shyǵaryndylary kóleminiń ulǵaıýymen baılanysty. Olardyń jaǵymsyz áserin azaıtý maqsatynda tıisti sharalar ázirleý qajet», - dep málim etti vedomstvodan. 

Osyǵan baılanysty quzyrly organ Tashkent qalasynda kelesi shekteý sharalaryn engizýdi usynyp otyr:

- «Eýro-4» standartyna saı kelmeıtin janarmaıdy (AI-80 markaly janarmaı) paıdalanýǵa tyıym salý;

- keptelis bolatyn ýaqyttarda júk kólikteriniń qozǵalysyna shekteý (07:00-den 10:00-ge deıin jáne 17:00-den 20:00-ge deıin) qoıý;

- 2010 jylǵa deıin shyǵarylǵan barlyq avtokólik quralynyń qozǵalysyna tyıym salý. Elektromobılderge kóshken kólik ıelerine jeńildikter, preferentsııalar men sýbsıdııalar berý;

- magıstraldardaǵy keptelisti azaıtý jáne avtomobıl qozǵalysyn ońtaılandyrý úshin tájirıbe retinde kólikterdi «taq jáne jup» kúnderi júrgizý erejesin engizý;

- qalanyń ortalyq kóshelerinde avtokólikten bos aımaqtardy uıymdastyrý; 

– tıisti ınfraqurylymdy qura otyryp, qoǵamdyq kólikti balamaly otyn túrlerine, ıaǵnı elektr jáne gazǵa aýystyrý. 

Sondaı-aq kásiporyndar men jylý ortalyqtarynda kómir men mazýtty paıdalanýǵa tyıym salý usynylady. Vedomstvo obektilerdiń barlyq túrlerin (áleýmettik jáne memlekettik mańyzy bar obektilerden basqa) salýǵa moratorıı jarııalaý, Tashkenttiń aınalasynda jasandy sý aıdyndary men jasyl beldeý qurý, sondaı-aq aýa sapasynyń kórsetkishteri jarııalanatyn monıtorlar ornatýdy oryndy dep esepteıdi.