«Tartyl Fest» jastarǵa erekshe motıvatsııa berdi – qyzylordalyq jeńimpaz
- Aqberen, respýblıkalyq jarystyń oblystyq kezeńine qatysqanda aldyńa qoıǵan maqsatyń qandaı edi? Jeńimpaz atanatynyńa senimdi boldyń ba?
- Men atalǵan sportqa kezdeısoq keldim. Bes jyldaı buryn densaýlyǵym syr berip, ota jasatýǵa týra keldi. Qashanda sergektikti serik etken adam qandaı qıyndyqty da jeńe biledi ǵoı. Densaýlyq jaǵdaıymdy jaqsartqym keldi. Osylaısha júgirý men beltemirge tartylýǵa kóńil aýdardym. Sodan beri turaqty túrde aınalysyp kelemin. Oǵan esh ókinbeımin. Qazir densaýlyǵyma baılanysty eshqandaı qıyndyq joq.
Elimizde «Tartyl Fest» týrnıri jaıly estigende oǵan qatysýǵa sheshim qabyldadym. Jarysqa daıyndyǵymdy pysyqtaı tústim. Jalpy, beltemirge tartylýdyń da qyr-syry kóp. Alǵashqyda ol saǵan aýyr tııýi múmkin. Ýaqyt óte kele oǵan boıyńda úırenedi. Men jarysqa daıyndyǵymdy kún saıyn pysyqtaı tústim. Respýblıkalyq týrnırdiń Qyzylordada ótken irikteý kezeńinde jeńimpaz bolýǵa bar kúshimdi saldym.
- Jarys barysynda sen rekordtyq kórsetkishti jańartýǵa sál ǵana qalǵanyńdy bilemiz. Sol sátte saǵan ne jetispedi? Tipti, seniń atalǵan kórsetkishti jaqsartýǵa da múmkindigiń bar sekildi kóringen edi...
- Onyńyz ras. Saıysta túrli sátter bolýy múmkin. Ras, jarys barysynda ózime senimdi oıyn kórsetip jattym. Rekordtyq kórsetkishti jańartamyn degen maqsatym bar edi. Osy maqsatta úzbeı daıyndyq júrgizdim emes pe? Bálkim, sol sátterde psıhologııalyq turǵydan álsizdik tanytyp qoıdym ba? Áıteýir, alǵa qoıǵan maqsattyń údesinen shyǵa almadym. Dese de jeńimpazdar qatarynan kóringenime qýanyshtymyn. Qyzylordadan keıin ótken qalalarda rekordty jańartqandar bar. Endi solarmen saıysýǵa múmkindik alyp otyrmyn. Sol joly ketken olqylyqtyń ornyn toltyrýǵa kúsh salamyn.
- Qarsylastaryń da osal emes sekildi. Olar jaıynda oıyń qandaı?
- Árbir jarystyń zańdylyǵy sol emes pe? Saıysqa qatysýshy jeńimpaz atanýdy qalaıdy. Endi bárimizdi respýblıkalyq deńgeıdegi báseke kútip tur. Elimizdiń barlyq aımaǵynan jınalǵan tájirıbeli sportshylar bas júldeni sarapqa salady. Ózimniń de solardyń qatarynda bolǵanyma qýanyshtymyn. Alǵashqyda densaýlyq jaǵdaıymdy túzeý maqsatynda beltemirdi janyma serik etken edim. Endigi kezekte bir óńirdiń atynan saıysqa túsýge jol ashylyp otyr. Syr óńiriniń abyroıyn asqaqtatýǵa bar kúshimdi salamyn. Oǵan daıyndyǵymdy júrgizip jatyrmyn. Jeńiske jetken jaǵdaıda ákemdi qajylyqqa jibersem degen maqsatym bar. Barlyǵy ózimniń qolymda tur.
- Seniń oıyńsha, atalǵan týrnır jastar arasynda qandaı qyzyǵýshylyq týǵyzdy? Mundaı jarystar aldaǵy ýaqytta turaqty ótkizilip turǵany durys pa?
- Atalǵan týrnır bolatynyn estigende kóptegen jas jigitter oǵan qatysýǵa bel baılady. Beltemirge tartylyp, daıyndyǵyn pysyqtady. Qysqasy, oǵan yqylas tanytqan jastardyń qatary kóbeıdi. Buqaralyq sıpat aldy. Sondyqtan týrnırdiń jastarǵa tıgizgen paıdasy ushan-teńiz.
Jarysqa barardyń aldynda maǵan aldymen ózimniń otbasym qoldaý bildirdi. Bul meni qanattandyra tústi. Týrnır barysynda az-maz qobaljý bolǵany ras. Alaıda, ózime jaqyn jandardyń qoldaýy meniń alǵa qaraı umtylýyma úlken áser etti.
Qaı kezde de sergektikti serik etken adamnyń densaýlyǵy myqty bolady. Árbir adamnyń kúndelikti sportpen aınalysýyna múmkindigi joq shyǵar. Dese de bir mezet beltemirge tartylyp, dene jattyǵýyn jasap turýyna eshqandaı kedergi joq. Kópshilikti densaýlyqqa paıdasyn tıgizetin osyndaı salaýatty ómir saltyn ustanýǵa shaqyramyn.
Meniń oıymsha, atalǵan týrnırdiń jastardyń sportpen aınalysýyna úlken moıtvatsııa bolady dep sanaımyn. Baıqaǵanym, bizdiń oblystyń ózinde onda qanshama adam baq synady. Al elimizde olardyń sany birneshe myńnan asty. Qysqasy, qysqa ýaqyttyń shinde halyqtyq sharaǵa aınalyp úlgerdi. Sol sebepti atalǵan týrnırdiń turaqty ótkizilýin qoldaımyn. Ol ýaqytta qatysýshylar sany budan da arta túsýi múmkin.
- Kúndelikti qansha ýaqytyńdy sportqa arnaısyń? Oǵan jergilikti óńirde qandaı jaǵdaı jasalǵan?
- Qazirgi kúni sergektikti serik etýge qolaıly jaǵdaı bar. Aral aýdanynda jergilikti turǵyndarǵa arnalǵan ortalyq stadıon men sekildi jastardyń jıi bas qosatyn ornyna aınaldy. Tirshilikten qolym qalt etken sátte sol jerden tabylýǵa tyrysamyn. Bul meniń kúndelikti qaǵıdama aınaldy. Aýdanda men sekildi azamattar sany az emes. Barlyq jerlesterimdi sportpen aınalysýǵa shaqyramyn.
Qashanda deni saý azamat árbir memlekettiń negizgi tiregi emes pe? Bolmashy syrqatqa boı aldyryp, soǵan qyrýar qarjy jumsaǵansha árdaıym sergektikti serik etken artyq emes. Qazir mundaı azamattardyń sany kóbeıip kele jatqany qýantady. Olardyń qatary áli de arta túsetinine senimdimin.
- Sóz sońynda otbasyń jaıly aıta ketkeniń artyq bolmas.
- Men ákem jáne inimmen birge turamyn. Anam 2005 jyly ómirden ótti. Ózim de shańyraq kótergenmin. Kelinshegim men eki balam bar. Barlyǵymyz otbasylyq kásippen aınalysamyz. Ákem bazarda saýdamen aınalysady. Sol kisige qolǵabys jasaımyz.
-Áńgimeńizge rahmet!
Foto keıipkerdiń jeke arhıvinen