Tartyl Fest: Óskemen qalasynyń ákimi týrnıkke tartyldy

ÓSKEMEN. QazAqparat – Óskemende Tartyl Fest respýblıkalyq festıvalinde qala ákimi Jaqsylyq Omar týrnıkke tartyldy, dep habarlaıdy QazAqparat tilshisi.

Búgin Tartyl Fest respýblıkalyq festıvali Óskemende ótip jatyr.

Bul - atalmysh festıvaldi qabyldap otyrǵan 18-shi qala. Sharanyń maqsaty – buqaralyq sportty damytý jáne jastardy salaýatty ómirge baýlý.

Jalpy shahar boıynsha QR Prezıdenti janyndaǵy «Dara» daryndylardy qoldaý qory uıymdastyryp otyrǵan festıvalge qatysýǵa 250-ge jýyq adam nıet tanytty.

Shara barysynda Óskemen qalasynyń ákimi Jaqsylyq Omar da baq synap kórdi. Ákim týrnıkke 15 márte tartyldy.

Jasy 50-den asqan Amanjan Meıimhanov Tartyl Fest-te óner kórsetý úshin Katonqaraǵaı aýdanynan arnaıy kelgen.

«Es bilgeli sportpen aınalysyp kelemin. Kún saıyn tańerteń erte turyp, júgiremin. Ústel tennısin oınaǵan unaıdy. Osyndaı sharalar jıi uıymdastyrylyp otyrsa deımin. Festıvaldiń talaptary ońaı emes eken. 26 ret tartyla aldym», - dedi ol agenttik tilshisine.

Esterińizge sala ketsek, osyǵan deıin Óskemende Tartyl Fest respýblıkalyq týrnıkke tartylý festıvali bastalǵanyn habarlaǵan edik.