«Tartyl Fest» ómirimizdegi mańyzdy jarystardyń biri bolmaq – halyqaralyq dárejedegi sport sheberi Rafaıl Qadyrov
- Rafaıl Muratuly, ózińizdi tanystyryp ketińizshi.
- Men Mamlıýt aýdanyndaǵy eldi mekenderdiń birinde dúnıege keldim. Qazirgi ýaqytta Petropavlda turyp jatyrmyn. M.Qozybaev atyndaǵy SQÝ túlegimin. Dene shynyqtyrý jáne sport mamandyǵy boıynsha bilim aldym. Qazir Petropavldaǵy № 7 orta mektepte dene shynyqtyrý páninen sabaq beremin. Kásibı sporttan da qol úzgen joqpyn. Polıatlonnan túrli deńgeıdegi jarystarda óńir, el namysyn qorǵap júrmin.
- Sportqa qashan keldińiz, ne túrtki boldy?
- Aýylda týyp-ósken balalardyń barlyǵy sportqa jaqyn bolady dep oılaımyn. Óıtkeni, kúnimiz negizinen dalada, oıynmen, júgirýmen ótetin. Sondyqtan kishkentaıymnan sportpen aınalystym dep aıta alamyn.
Al sporttyq mansabym 2010 jyly bastaldy. Sol jyly Petropavldaǵy gýmanıtarlyq-tehnıkalyq kolledjge oqýǵa túsken edim. Maǵan buǵan deıin beıtanys sport túri - polıatlonnan jarysqa qatys degen usynys tústi. Sol týrnırde Aleksandr Chernıkov degen jattyqtyrýshynyń kózine túsip, sodan beri osy sport túrimen úzbeı aınalysyp kelemin.
- Rafaıl Muratuly, aldyńyzda «Tartyl Fest» respýblıkalyq týrnırinde jaqsy óner kórsetý mindeti tur. Daıynsyz ba?
- Sońǵy daıyndyq jumystary júrip jatyr. Ol jerge myqtylardyń myqtysy jınalatyny belgili. Bizge sheberlikti odan ári shyńdaýǵa jarty jylǵa jýyq ýaqyt berildi. Ol ýaqytty tıimdi paıdalandym dep oılaımyn. Meniń jattyǵýym 10 kúndik tsıklge negizdelgen, 5 kún jattyǵyp, 5 kún demalamyn, ıaǵnı jattyǵý kúnara ótti. Qazir bir jattyǵýda týrnıkte tartylýǵa 2,5 saǵat ýaqyt jumsap júrmin. Bul óz nátıjesin berip jatyr. Jeke kórsetkishimdi jaqsarttym. Respýblıkalyq týrnırde joǵary nátıjege qol jetkizý úshin bar kúshimdi jumsamaqpyn.
- Petropavlda ótken týrnırde Siz beltemirge 45 ret tartylyp, óńir sportshylary arasynda eń úzdik kórsetkishke qol jetkizdińiz. Jalpy, sizdiń sanatyńyzda rekordtyq kórsetkish qandaı?
- Meniń sanatym - 30 jastan asqandar arasyndaǵy 80 kg deıingi salmaq dárejesi. Qazir respýblıka boıynsha úzdik kórsetkish Evgenıı Namdiki. Ol beltemirde 50 ret tartyldy. Sportshy Qaraǵandy qalasynyń týmasy. Respýblıkalyq týrnırde jaqsy rekordtyq kórsetkishterdiń kýási bolamyz dep oılaımyn.
- Beltemirde tartylýdyń qandaı paıdasy bar?
- Beltemirde tartylý adamnyń jalpy fızıkalyq jaǵdaıyn jaqsartady, qoldyń, ıyqtyń býyndaryn bekitip, adamnyń tózimdiligin arttyrady. Júrekke, qan tamyrlaryna durys júkteme beriledi. Tynys alý júıesiniń jumysyn jaqsartady. Mundaı kúndelikti kardıojúktemeler júrek bulshyqetin damytyp, qan qysymyn durystaýǵa paıdasy zor.
Denebitimin ádemi etý úshin de beltemirge tartylýǵa keńes beremin. Alaıda, qarsy kórsetilimderi de bar, ony da umytpaǵan jón. Ásirese, osteohondroz, osteoartroz aýrýlary bar adamdarǵa beltemirge tartylýǵa bolmaıdy. Sondaı-aq ózińdi qınap, kúndelikti tartylýdyń da qajeti joq, ol aǵzaǵa zııan ákelmese, paıdasy shamaly.
- Siz polıatlonnan jarystarǵa qatysasyz. Ol qandaı sport túri?
- Polıatlon – ol prezıdenttik kópsaıys. Oǵan pnevmatıkalyq vıntovkadan nysana atý, beltemirde tartylý, ıaǵnı 4 mınýt ishinde belgili bir mólsherde tartylý qajet jáne shańǵy jarysy kiredi. Osy úsheýiniń ishinde men úshin beltemirge tartylýdyń orny bólek. Polıatlondy da beltemirde tartylýǵa múmkindik bolǵannan keıin ǵana tańdadym. Óıtkeni kishkentaıymnan týrnıkke tartylǵandy unatamyn. Qolym bosasa keshke aýyldaǵy alańǵa baryp, beltemirge tartylatynmyn. Sodan da bolar kolledjge oqýǵa túskende bapker meniń kúshimdi baıqap, jarysqa qatysýdy usyndy.
Men úshin polıatlonda eń qıyny shańǵymen júgirý. Basqalaryna qaraǵanda kóp ýaqyt bólý kerek. Polıatlonda úsheýinen de jaqsy kórsetkish bolýy shart, úsheýiniń qosyndysy baǵalanady. Jalpy nátıjem jaman emes, halyqaralyq dárejedegi sport sheberimin. Álem chempıony boldym, sondaı-aq Qazaqstan chempıonymyn.
Maqsatym – polıatlonnan budan da jaqsy kórsetkishterge qol jetkizý, sporttyń osy túrinde úzdik bolý. El namysyn baıraqty básekelerde qorǵap, kók týymyzdy jelbiretý.
- «Tartyl Fest» týrnırine qatysýshylarǵa qandaı tilegińiz bar?
- Qarsylastarymmen erteń 18 aqpan kúni ótetin «Tartyl Fest» respýblıkalyq týrnıriniń grand-fınalynda kezdesemiz. Barlyǵyna eń aldymen densaýlyq tileımin. Bul, meniń oıymsha, barlyǵymyz úshin ómirimizdegi mańyzdy jarystardyń biri. Árıne, myqtylar jeńiske jetsin!
- Rahmet!
Foto: Rafaıl Qadyrovtyń jeke muraǵatynan alynǵan