Tartyl Fest kópshilikti ózin-ózi damytýǵa ıtermeledi – týrnıkke tartylý jarysynyń fınalısi
- Sportpen qashannan beri aınalysyp kelesiz?
- Shynymdy aıtsam, bala kúnde sportqa onsha jaqyn bolmadym. Áljýaz bolǵandyqtan synyptastarym únemi mazaq etetin. Sol kezde sportpen aınalyspasam bolmaıtynyn túsindim. Ózim úshin keýdeni jerden kóterip-túsirýden, týrnıkke tartylýdan jattyǵý jasaı bastadym. Biraq sporttyń belgili bir túrine qatyspadym.
- Týrnıkte tartylyp júrgenińizge qansha boldy? Jeke rekordyńyz qandaı?
- Naqty esimde joq. Mektepte oqyp júrgende tartyla bastadyq qoı. Ózimdi qaırap, týrnıkte joq degende 5 ret tartylýǵa sert ettim. 10-synypta oqyp júrgende týrnıkte jaqsy tartylatyn boldyq. Solaı qyzyǵýshylyǵym da artty. Áskerı dalalyq oqý-jattyǵý jıynynda 29 ret tartylyp, birinshi oryn alǵanym bar. Beıresmı jeke rekordym – 40.
2018 jyly oblystyq irikteýden ótip, 5 adam bolyp Aqtaýǵa halyq oıyndaryna bardym. Sonda salmaq boıynsha tartylǵandar arasynda úshinshi oryn ıelendim.
Jalpy týrnıkke tartylǵannyń paıdasy kóp qoı. Únemi sergek júresiń. Densaýlyqqa da paıdasy zor. Deneń tiktelip, kúshiń artady. Odan keıin ózińe senimdi júresiń. Al ózine senimdi adam jetistikterge jete alady. Sol úshin barshańyzdy týrnıkke tartylýdy ádetke aınaldyrýǵa shaqyramyn.
- «Tartyl Fest» jobasy týraly qaıdan estidińiz jáne qatysýǵa nelikten bel býdyńyz?
- Tartyl Fest týraly Instagram áleýmettik jelisinen bildim. Kóp oılanbaı qatysyp kórýge sheshim qabyldadym. Sebebi ózimdi synap kórgim keldi. Sportpen kásibı túrde aınalyspaǵannan keıin jarystaǵy jeńistiń dámi qalaı bolatyndyǵyn bilgiń keledi ǵoı. Osylaısha, ótetin ýaqytty tosyp júrdim. Árıne, ýaqyt taıaǵan saıyn daıyndyqty kúsheıtýge tyrystym.
- Týrnıkke tartylý festıvali Óskemende qalaı ótti?
- Óte joǵary deńgeıde uıymdastyryldy. Barlyǵy búge-shigesine deıin oılastyrylǵan eken. Jınalǵan jurt qarasy az bolǵan joq. Kóbisi jastar. Barlyǵy ózin kórsetkisi keldi. Estýimshe, qala boıynsha 250-ge jýyq adam qatysty. Tústen keıin Óskemen qalasynyń ákimi Jaqsylyq Omar keldi. Ol da festıvalge qatysyp, týrnıkke tartyldy. Jalpy tóreshiler qatal, biraq ádil boldy. Sondyqtan eshkim renjigen joq.
Ózim 18-30 jas sanatynda, 65-80 keli aralyǵyndaǵy salmaqta baq synadym. 37 ret tartylyp, birinshi oryn ıelendim. Ekinshi oryn alǵan jigit 31 ret, úshinshi orynǵa jaıǵasqany 29 ret tartyldy. Qýanyshymda shek bolǵan joq. Maǵan medal men 200 myń teńge mólsherinde aqshalaı syılyq berildi. Eń bastysy, Astana qalasynda ótetin grand-fınalǵa joldama aldym.
- Qaı salada jumys isteısiz?
- Qaladaǵy mektepterdiń birinde dene shynyqtyrý páninen sabaq beremin. Balalarǵa týrnıkke tartylýdyń paıdasyn únemi aıtyp júremin.
- Grand -fınalǵa qandaı úmitpen barasyz?
- Shamam kelgenshe jaqsy óner kórsetýge tyrysamyn. Ol jaqta endi qarsylastar osal bolmaıdy. Elimizdiń túkpir-túkpirinen kil myqtylar jınalady. Qalamyzdyń namysyn abyroımen qorǵaý úshin barymdy salamyn. Bas qalaǵa birge attanǵaly otyrǵan jerlesterime sáttilik tileımin!
- Jalpy Tartyl Fest jobasy týraly ne oılaısyz? Mundaı halyqtyq jarystar qajet pe? Uıymdastyrýshylarǵa qandaı tilek, usynysyńyz bar?
- Bul joba kópshilikti ózin-ózi damytýǵa bastady dep sanaımyn. Shynymdy aıtsam, bir-eki jyl buryn mundaı jetistikke jetemin dep oılaǵan da emespin. Meniń tilegim, dál osyndaı jarys kem degende 2-3 jylda bir ret ótkizilip tursa jaqsy bolar edi. Sebebi sonyń arqasynda halyq týrnıkke tartylyp, sportqa bir taban jaqyndaıdy. Tartyl Fest týrnıkke tartylý jarysyn uıymdastyrýshylarǵa shyn júrekten alǵys aıtamyn! Eńbekterińiz janyp, elge paıdaly dúnıelerdi qolǵa ala berińizder!
- Áńgimeńizge kóp rahmet! Aldaǵy grand-fınalda sáttilik serik bolsyn!
Aıta keteıik, Tartyl Fest jobasy QR Prezıdenti janyndaǵy «DARA» talanttardy qoldaý qorynyń bastamasymen uıymdastyrylǵan. Joba ıdeıasyn belgili qazaqstandyq prodıýser Nurlan Qoıanbaev usynǵan, al jobanyń brend-elshisi – Street Workout boıynsha rekordsmen Aıtym Jaqypov.
18 aqpanda ótetin grand-fınalǵa óńirlik irikteý jarystarynda úzdik nátıje kórsetken 170 sportshy qatysady. Qatysýshylardyń jasy – 14-51 jas aralyǵynda. Ótken jyly týrnıkke tartylýdan jarys Qazaqstannyń 20 qalasynda ótken. Onda 7 myńnan astam qazaqstandyq toǵyz salmaq dárejesinde saıysqa tústi. Tartylý sany boıynsha rekord 33 jastaǵy tarazdyq Evgenııge tıesili – ol 50 ret tartylǵan.