Tartyl Fest fınalyna qatysatyn oqýshy Kók týdy bıikte jelbiretýdi armandaıdy
- Taıyr, ótken jyly tamyz aıynda Oralda ótken «Tartyl Fest» festıvalinde 18 jasqa deıingiler arasynda jeńimpaz atandyń. Osy jarysqa qatysý týraly oıǵa qalaı bekindiń?
- Jazǵy demalys kezinde anam Instagram áleýmettik jelisinen jańadan uıymdastyrylǵan «Tartyl Fest» atty týrnırdiń jarnamasyn kórdi de, kermege jaqsy tartylatynymdy biletindikten, qatysyp kórýge usynys jasady. Men mektepter arasyndaǵy áskerı daıyndyq dodasynda kermege tartylýdan eki ret júldeger atanyp, respýblıkalyq «Aıbyn» jarysyna qatysqan edim. Kóp oılanbastan kelistim de, baǵymdy synap kórýge bel baıladym. Jasyratyny joq, bul saıysqa qalanyń kil myqtylary qatysatynyn bilgendikten, jeńiske jetetinime asa senimdi bolmadym. Degenmen sol dodada 31 ret tartyla aldym. Bul 55 kelige deıingiler arasynda jeńiske jetýime jetkilikti boldy.
- Endi elordada ótetin qorytyndy fınalǵa daıyndyq qalaı júrip jatyr, óz kórsetkishińdi jańarttyń ba?
- Fınalǵa daıyndyq barynsha júrip jatyr. Bul sportpen kásibı aınalyspaǵan soń, arnaıy jattyqtyrýshym joq bolǵandyqtan, sport mamandarynan barynsha keńes alyp, ázirlenýdemin. Kóbine Jáńgir han atyndaǵy Batys Qazaqstan agrarlyq-tehnıkalyq ýnıversıteti (BQATÝ) ǵımaratyndaǵy jattyǵý zalynda daıyndalyp jatyrmyn. «Tartyl Fest» týrnıriniń Oraldaǵy kezeńinde jibergen qatelikterimdi, basqa qalalardaǵy qatysýshylardyń deńgeılerin saralap, oı júgirtip, óz olqylyqtarymnan qorytyndy shyǵarýdamyn. Iá, kórsetkishterim jarystan keıin turaqty fızıkalyq jattyǵýlardyń jáne júıeli túrdegi daıyndyqtyń arqasynda ósti. Qazir 35-40-qa deıin jetkizip jatyrmyn.
- Únemi jattyǵýdan nátıje shyqqany jaqsy ǵoı. Ómirlik jolyń, ata-anań, óz ortań jóninde aıtyp ótseń?
- Qarapaıym otbasynda dúnıege keldim. Otbasyndaǵy ekinshi balamyn. Ákem Qarjaýbaı Dosov Jáńgir han atyndaǵy BQATÝ-da aǵa oqytýshy, anam Almagúl Tólegenova da osy ýnıversıtette qyzmet etedi. Men dúnıege segiz aılyq bolyp keldim. Sol sebepti de kishkentaı kezimde áljýaz jáne aýrýshań boldym. Kishkentaıymnan-aq ákem «Er bala shynyqqan, myqty bolýy kerek» dep sportqa baýlydy. Ózi de ústel tennısinen áýesqoı sportshy. Al anam «Ár qazaq dombyra tarta bilýi kerek», dep, dombyra úıirmesine qatystyrdy. Alty jasymda alǵash mektep tabaldyryǵyn attadym. Eń birinshi barǵan mektebim jalpy bilim beretin №20 orta mektep edi. Eń alǵashqy qyzyqty, balalyq sátterim sol mektepte ótti. Ekinshi synypqa kelgende, Halyq qaharmany Hıýaz Dospanova atyndaǵy №30 mektepke aýystym. Ondaǵy synyp jetekshim ekinshi ata-anamdaı, synybymdaǵy balalar da týǵan baýyrlarymdaı bolyp ketti. Sol mekteptegi dostarymdy eshqashan umytpaımyn, óıtkeni olarmen ótken kúnderim umytylmastaı boldy.
Endi, buıyrsa, aqpan aıynyń ortasynda elimizdiń astanasyna jol túskeli tur. Budan buryn 2019 jyly jazǵy demalysta Astanada alǵash ret bolyp edim. Elordamyz keremet qoı, tamasha áser qaldyrdy. Bul joly ákemmen birge barmaqshymyn. Osy jarysta jeńiske jetip jatsam, ony ata-anama, dostaryma arnaǵym keledi.
- Qazir qaıda oqyp júrsiń, bolashaqta qandaı mamandyqtyń tutqasyn ustaǵyń keledi?
- Qazirgi ýaqytta Qadyr Myrza Álı atyndaǵy №47 orta mektepte bilim alyp jatyrmyn. Kóp uzamaı mektep bitirip, úlken ómirge joldama almaqshymyn. Osy jerde synyptastarymmen tanysyp, jańa dostar taptym. Bolashaqta dáriger mamandyǵyn meńgerip, medıtsına salasynda qyzmet atqarǵym keledi.
- Qandaı sport túrimen shuǵyldanasyń?
- Budan buryn erkin kúres jáne qol kúresimen aınalystym. Kezekti jarysqa ázirlik kezinde qolymdy syndyryp aldym. Sol sebepti kópke deıin jattyǵýdy toqtata turýǵa týra keldi. Biraq sporttan esh alshaqtaǵym kelmedi, sondyqtan qolym tolyqtaı saýyqqansha, bir jeńil-jelpi sportpen aınalysa turaıyn dep, kermege tartylýdy ádetke aınaldyrdym. Bul maǵan qatty unady da, osy kezge deıin bul sport túrimen áýesqoı deńgeıde aınalysyp kelemin.
- Taıyr, qaı sport túrin qyzyqtap qaraısyń?
- Ózim buryn da kúrespen aınalysqandyqtan, kúresten ótetin jarystardy qaraǵandy jaqsy kóremin. Jáne de taǵy bir qyzyǵyp tamashalaıtyn sport túri, bul – voleıbol. Degenmen barlyq sport túrin janyma jaqyn sanaımyn.
Ázirge bos ýaqytym bolyp jatqan joq. Barlyǵyn keste boıynsha jasaımyn. UBT-ǵa daıyndalamyn jáne sporttyq úıirmege baramyn.
- Aldaǵy arman-maqsattaryń jóninde ne aıtar ediń?
- Alǵa qoıǵan arman-maqsattarym kóp. Solardyń eń bastylaryn aıtaıyn. Eń aldymen alda ótkeli turǵan respýblıkalyq jarysta birinshi oryn alsam deımin. Sosyn eger álemdik dodaǵa joldama berse, onda da aldan kórinip, kók týymyzdy bıikte jelbiretsem, bir maqsatymnyń oryndalǵany der edim. Al ekinshisi, UBT-dan súrinbeı ótip, qalaǵan oqý ornyma túsip jáne de bilikti maman atanyp, elime, ata-anama paıdamdy tıgizsem deımin. Meniń osyndaı deńgeıge jetýime sport ta septesti dep bilemin. Sondyqtan qatarlastarymdy tereń bilim alýmen birge sportpen turaqty aınalysýǵa shaqyramyn. Eń bastysy, elimizdiń odan ári damyp, gúldene túsýine súbeli úles qosa alatyn azamat bolǵanǵa ne jetsin!
- Áńgimeńe rahmet!
Eske sala keteıik, budan buryn «Tartyl Fest» festıvaliniń Oraldaǵy jeńimpaz-júldegerleri anyqtalǵanyn jazǵan bolatynbyz.
«Tartyl Fest» fınaly Astanada 18 aqpanda ótedi.
Osyǵan deıin «Tartyl Fest» týrnıriniń aqtyq saıysyna qatysatyn oraldyq 2 sportshymen suhbat qurǵan edik. Olardyń biri ıÝrıı Kıchatov súıgenin jattyǵý kezinde tapqanyn aıtqan bolsa, Aleksandr Badık Qazaqstanda sportty damytýǵa úles qosqysy keletinin jetkizdi.
Fotolar keıipkerdiń jeke muraǵatynan.