Tartyl Fest fınalısi: Hobbıim de, jumysym da – sport

ÓSKEMEN. QazAqparat – Paýerlıftıngten sport sheberi Ahmet Terlikbaev Astanada 18 aqpan kúni ótetin «Tartyl Fest» respýblıkalyq týrnıriniń grand-fınalyna qatysady.

Óskemende ótken jarysta óz salmaǵynda jeńimpaz atanǵan ol jeke jattyqtyrýshy bolyp jumys isteıdi.

Ahmet Terlikbaev 32 jasta. Sportpen bala kúnnen aınalysyp keledi. Eń áýeli kúrespen shuǵyldanypty.

«Mektep oqyp júrgende synyptasym erkin kúreske barýǵa shaqyrdy. Kóp oılanbaı kelise kettim. Týrnıkke de bala kúnnen tartylyp kelemin. Úıde de týrnık jasatyp, kúnde jattyǵyp júrdim. Ázirge jeke rekordym – 30», - deıdi ol.

«Tartyl Fest» jobasy týraly jattyǵý zalynda júrgende kezdeısoq estip qalyp, qatysýǵa sheshim qabyldaǵan. Óıtkeni óziniń jaqsy nátıje kórsetetinime senimdi bolǵan.

«Óskemendegi jarys óte joǵary deńgeıde uıymdastyryldy. Qatysýshylar kóp boldy. Biraq kúnde jattyǵyp júrgendikten jeńimpaz bolatynyma kúmánim bolǵan joq», - deıdi sportshy.

30 jastan asqandar arasynda 90 keliden joǵary salmaqta qatysqan Ahmet Terlıkbaev 24 ret taza tartylyp, birinshi oryn aldy. Al 2-oryndy Vadım Salmanhanov (17 ret), 3-oryndy Ádilet Abylǵazınov (15 ret) ıelendi. Osylaısha, ol qarsylastarynan oq boıy ozyp ketti.

«Bolashaqta bodıbıldıng pen paýerlıftıngten jarystarǵa qatysyp, bıik belesterdi baǵyndyrǵym keledi. Qazir sol úshin kúndelikti jattyǵyp, tynbaı daıyndalyp júrmin. Paýerlıftıngten sport sheberi atandym. Ózimniń jattyqtyrýshym bar. Ol maǵan baǵyt berip, jol nusqap otyrady. Hobbıim de, jumysym da – sport. Osy baǵytty tańdaǵannan keıin jetistikterge jetkim keledi», - deıdi Ahmet.

Onyń aıtýynsha, «Tartyl Fest» sııaqty jarystar óte qajet. Osyndaı respýblıkalyq týrnır jyl saıyn ótkizilip turǵany jón.

«Týrnıkke tartylý jarysynda fınalǵa shyqqanyma óte qýanyshtymyn. Jeńiske jetý úshin barymdy salamyn! Elordaǵa altyn medal men 3 mln teńgeni ıelený úshin attanamyn», - deıdi Ahmet Terlikbaev.

Eske salsaq, «Tartyl Fest» týrnıkke tartylýdan óńirlik jarys Óskemende 30 tamyz kúni ótken edi.

Óskemen qalasynyń ákimi de týrnıkke tartylǵan bolatyn.

18 aqpanda Astanada ótetin grand-fınalǵa óńirlik irikteý jarystarynda úzdik nátıje kórsetken 170 sportshy qatysady. Qatysýshylardyń jasy – 14-51 jas aralyǵynda. Ótken jyly týrnıkke tartylýdan jarys Qazaqstannyń 20 qalasynda ótken. Onda 7 myńnan astam qazaqstandyq toǵyz salmaq dárejesinde saıysqa tústi. Tartylý sany boıynsha rekord 33 jastaǵy tarazdyq Evgenııge tıesili – ol 50 ret tartylǵan.

Foto Ahmet Terlikbaevtyń jeke muraǵatynan