Tartyl Fest fınalısi: Balalarǵa dene shynyqtyrýdan sabaq bergim keledi

ASTANA. QazAqparat – Byltyr bastalǵan Tartyl Fest respýblıkalyq týrnıriniń qatysýshylary arasynda túrli sala maman ıeleri bar. Sonyń biri - shymkenttik Jandos Turǵynbaev. Mamandyǵy boıynsha dene shynyqtyrý pániniń muǵalimi. Biraq, jumys istemegen, endi meńgergen kásibi boıynsha eńbek etýdi josparlap otyr. QazAqparat tilshisi áýesqoı sportshyny áńgimege tartqan edi.

32 jastaǵy Jandos Turǵynbaev - Shymkent qalasynyń turǵyny. Aıtýynsha, týrnıkke tartylýǵa bala kúninen áýes.

«Boıdaqpyn. Ázirge turaqty jumysym joq. Buıyrsa, jumysqa turamyn. Mamandyǵym dene shynyqtyrý pániniń muǵalimi, biraq mamandyǵym boıynsha jumys istemegenmin. Armanym - mamandyǵym boıynsha jumys isteý. Dene shynyqtyrý pániniń muǵalimi bolǵym keledi. Jumys izdeýge kiristim, túıindememdi taratyp jatyrmyn», - deıdi Jandos Turǵynbaev.

Qazir Jandos 18 aqpanda Astanada ótetin Tartyl Fest respýblıkalyq týrnıriniń grand-fınalyna qyzý daıyndalyp jatyr.

«Jattyǵý zalyna baryp, kúndelikti daıyndalyp júrmin. Jalpy týrnıkke tartylýmen oqýshy kúnimnen aınalysyp kelemin. Qazir de turaqty aınalysamyn. Ótken jyly kúzde Astanada ótken týrnırge asa úlken daıyndyqpen barmadym. Endi alda grand-fınal daıyndyqty kúsheıtý kerek. Jalpy Tartyl Fest týraly áleýmettik jeliden bildim. Qonaev qalasynda ótip jatyr degendi estip, Shymkentte uıymdastyrylsa qatysamyn dep bel býǵam. Ókinishke qaraı, ótkizip aldym. Sosyn Astanada ótken jarysqa qatysý týraly sheshim qabyldadym. Bul jerde másele jarysýda ǵana emes. Jalpy sport adam densaýlyǵyna paıdaly, onyń ishinde týrnıkke tartylý da bar. Sonymen qatar adam jeńiske jetkende jigerlene túsedi. Jeńimpaz atansań, syılyq alsaq shabyttana túsesiń. Bul jaqsy ǵoı», - deıdi ol.

Onyń aıtýynsha, buqaralyq sportty damyta túsý maqsatynda jurtshylyqtyń qatysýymen ótetin is-sharalardy jıi ótkizý kerek.

«Byltyr Astanadaǵy týrnırde sońǵylardyń biri bolyp shyqtym. Nátıjesinde 36 ret tartyldym. Qarsylastarym myqty boldy. Estýimshe, aldaǵy grand-fınalda tártip, talap qıyndaı túspek. Mysaly, buǵan deıingi jarysta bir bastaǵanda kúshiń jetkenshe toqtaýsyz tartylatyn edik. Endi komandaǵa baǵynady ekenbiz. ıAǵnı týrnıkke tartylyp jatqanda saǵan toqta deıdi, toqtaı qalasyń, sanaýly sekeýndtan keıin komanda berilgende qaıta jalǵastyrasyń. Qıynǵa túseıin dep túr», - deıdi týrnır qatysýshysy.

Sondaı-aq, shymkenttik áýesqoı sportshy týrnıkke tartylýdyń áskerı mindetti ótegen kezde zor paıdasy tıginen aıtty.

«Sporttan tys tabıǵat aıasyna shyqqandy unatamyn. Ásirese jazdy kúnderi. Aldyma qoıǵan arman-maqsatyma kelsem, buıyrsa, otbasyn qurý jáne mamandyǵym boıynsha eńbek etip, dene shynyqtyrý muǵalimi bolýdy kózdep otyrmyn», - deıdi Jandos Turǵynbaev.

Eske salaıyq,18 aqpan kúni elordada Tartyl Fest respýblıkalyq týrnıriniń grand-fınaly ótedi.

Atalǵan sporttyq shara QR Prezıdenti janyndaǵy «DARA» talanttardy qoldaý qorynyń bastamasymen uıymdastyrylǵan.

Joba ıdeıasyn belgili qazaqstandyq prodıýser Nurlan Qoıanbaev usynǵan, al jobanyń brend-elshisi – «Street Workout» boıynsha rekordsmen Aıtym Jaqypov.

Grand-fınalǵa óńirlik irikteý jarystarynda úzdik nátıje kórsetken 170 sportshy qatysady. Qatysýshylardyń jasy – 14-51 aralyǵynda.

Fotolar keıipkerdiń jeke muraǵatynan