Tartyl Fest fınalısi – 11 jasar oqýshy armrestlıngten sport sheberligine úmitker

ÓSKEMEN. QazAqparat – Shyǵys Qazaqstan oblysy Ulan aýdany Prıvolnıe aýylynda turatyn Mansur Ýálıev «Tartyl Fest» respýblıkalyq týrnıriniń grand-fınalyna joldama jeńip aldy. 11 jasar Mansurdyń qarsylastaryna esh múmkindik qaldyrmaýy onyń tynbaı shynyǵyp júrýiniń arqasy. QazAqparat tilshisi ony áńgimege tartyp kórgen edi.

«Sportpen 4 jasymnan beri aınalysyp kelemin. Ákem qol kúresinen bapker bolyp jumys isteıdi. Birinshi armrestlıngten bastadym. Odan soń jeńil atletıka jáne dzıýdoǵa qatystym. Bul sport túrlerinen alǵan marapattarym az emes. Al týrnıkke tartylǵan ózime unaıdy», - deıdi Mansur.

Tartyl Fest jobasy týraly estigende birden qatysýǵa bel sheshken. Sebebi túrli jarysta baq synaǵandy jaqsy kóredi eken.

«Bul jarys týraly ákem tanysynan estipti. Maǵan qatysýǵa usynys jasaǵanda oılanbastan kelistim. Sóıtip, daıyndyqty bastap kettik. Kúnine 10 retten 10 márte qaıtalap tartylyp júrdim», - deıdi oqýshy.

Óskemendegi jarys 30 tamyz kúni uıymdastyryldy. Jalpy shahar boıynsha festıvalde 250-ge jýyq adam baq synaǵan. Onyń ishinde úzdik 27 qatysýshy marapattalyp, qarjylaı syıaqy aldy. Sonyń biri – osy Mansur.

Ol 55 kelige deıingi salmaqta 18 jasqa deıingi qatysýshylar arasynda óner kórsetken. Barlyǵy 36 ret tartylǵan Mansur ekinshi orynnan 6 ret kóbirek tartyldy. Atap aıtsaq, 2-oryndy Islam Saǵıev (30 ret), 3-oryndy Meıirjan Ermuhanbet (25 ret) ıelengen.

«Qazir armrestlıngten sport sheberligine úmitkermin. Astanaǵa baryp baq synaýǵa daıyndalyp júrmin. Osyndaı týrnırdiń uıymdastyrylǵanyna óte qýanyshtymyn. Barlyq qatysýshylarǵa sáttilik tileımin, - deıdi Mansur Ýálıev.

Sóz sońynda odan «Astanada jeńimpaz bolatynyńa senimdisiń be?» dep suradyq. Ol másele jeńýde emes, shama kelgenshe tyrysyp, jaqsy óner kórsetýde ekendigin aıtty. «Bárekeldi!» dep jas sportshyǵa sáttilik tiledik.