Tartyl Fest: Burynǵy kórsetkishimdi edáýir jaqsarttym – qyzylordalyq sportshy
- Muhammedhan, beltemirge tartylýǵa qansha jasyńnan bastap qyzyǵýshylyq bildirdiń?
- Jahandyq jeli betterinen mundaı sport túri bar ekenin burynnan biletin edim. Oǵan qyzyǵýshylyǵym erekshe boldy. Beltemirge tartylý kúnbe-kún daǵdyma aınaldy. Alǵashqyda ol qıyn kóringen edi. Ýaqyt óte kele boıym úırendi. Kórsetkishti jaqsarta tústim. Kúndelikti sergek júrýime oń áserin tıgizdi.
Tartyl Fest týrnıri jóninde bilgende oǵan qatysýǵa sheshim qabyldadym. Ázirligimdi pysyqtaı tústim. Jarysqa barǵannan keıin top jarǵan durys qoı. Osyndaı maqsatpen Qyzylordada ótken saıysqa keldim. Árıne, jarys barysynda mende tolqynys bolǵan shyǵar. Oǵan eshbir syr bergen joqpyn. Ózimniń dittegen maqsatyma jetýge bar kúshimdi saldym. Qarsylastarymnan ozyq shyqqanyma qýanyshtymyn.
Endi alda taǵy da jaýapty kezeń tur. Respýblıkalyq kezeńge elimizdiń barlyq aımaǵynan myqtylar jınalatyny belgili. Olarmen saıysqa túsýdiń ózi ońaıǵa soǵa qoımas. Dese de men jeńimpaz atanamyn degen oıdamyn. Oǵan daıyndyǵym jaqsy. Árbir bos ýaqytymdy tıimdi paıdalanyp jatyrmyn.
- Atalǵan týrnırge jastardyń qyzyǵýshylyǵy qandaı? Bul saıystyń mańyzdylyǵy nede?
- Eldiń ishinde men sekildi jastar az emes. Degenmen olardyń keıbiri sport túrlerimen turaqty aınalyspaıtyn shyǵar. Endigi kezekte beltemirge tartylý kúndelikti daǵdysy bolatyn azamattardyń sany kóbeıedi degen oıdamyn.
Qazir menen dostarym beltemirge tartylýdyń qyr-syryn surap jatady. Bilgenimdi bólisemin. Rasynda, álemde sporttyń atalǵan túri burynnan bar. Ol asqan eptilikti, jaýapkershilikti qajet etedi. Ekiniń biri oǵan shydaı bermeýi múmkin. Degenmen nıet tanytqan árbir adam dittegen maqsatyna jetedi degen oıdamyn.
Aıta keterligi, atalǵan sportpen kez kelgen orynda aınalysýǵa bolady. Beltemirdi qoldan jasap alýǵa múmkindik bar. Shydamdylyq tanytsań, odan keıin kórsetkishińdi jaqsartasyń. Endi biz sekildi jastardyń qatary kóbeıedi degen oıdamyn. Týrnır turaqty túrde uıymdastyrylsa degen usynysym bar.
Baıqaımyn, áleýmettik jeli betterinde atalǵan týrnır jaıynda jıi sóz bolyp jatady. Kópshilik tarapynan «Bul týrnır bıyl da ótkizile me» degen saýal qoıylady. Olardyń arasynda tek jastar emes, úlkenderdiń de bar ekenin baıqaımyn. Sondyqtan Tartyl Fest týrnıri eldiń erekshe nazar aýdaratyn saıysyna aınaldy degen oıdamyn. Men aýylda turamyn. Atalǵan saıys meniń ózime úlken áserin tıgizdi. Alǵa qaraı umtylýyma baǵyt berdi.
- Jerlesteriń tarapynan saǵan qandaı saýaldar jıi qoıylady?
- Shynyn aıtqanda, beltemirge tartylý sporty jóninde kópshilik habarsyz. Álemde ondaı jarystar bolatynyn bile bermeıdi. Jalpy, onyń adamnyń kúsh-jigerin arttyrýǵa paıdasy zor ǵoı. Ony kúndelikti jattyǵý barysynan baıqaımyn. Árbir adam boıyndaǵy jaǵymsyz ádetinen arylýǵa bolady. Jalqaýlyq janyńa jolamaıdy. Kúndelikti daıyndyq jasaýdy umytpaımyn. Túrli saıystarǵa qatysyp, múmkindigimdi arttyra tústim.
- Elordada ótetin jarysqa jaqyn qaldy. Qarsylastaryń jaıynda ne aıtar ediń?
- Qaı kezde de árbir qarsylasymdy laıyqty baǵalaımyn. Barlyǵy da jeńiske jetkisi keledi. Árbiri týrnırge tastúıin daıyndyqpen keletini kúmánsiz. Respýblıkalyq týrnır óte tartysty ótedi degen oıdamyn. Jankúıerler tartysty oıyndy tamashalaıdy degen senimdemin.
Jarysqa barardyń aldynda qarsylastaryń jaıynda kóbirek bilgeniń artyq emes. Olardyń qateligi men artyqshylyǵy týraly zerttep bilgeniń jón bolady. Bul saıys barysynda ózińe degen senimdilikti arttyra túsedi. Olardyń qateligin qaıtalamaýǵa nazar aýdarasyń.
Al ózim jarysta jerlesterimniń senimin aqtaımyn degen oıdamyn. Ýaqyt ótken saıyn tájirıbem men sheberligimdi arttyryp kelemin. Únemi izdenis ústindemin. Tynbaı jattyǵý jasaımyn. Nátıjesinde burynǵy kórsetkishimdi jaqsartýǵa múmkindik týdy. Ázirge ol jaıynda aıtpaı-aq qoıaıyn. Oblystyq kezeńdegi nátıjemdi edáýir jaqsarttym. Sondyqtan aldaǵy saıys barysynda joǵary nátıjege qol sozamyn degen maqsatym bar.
Men Jańaqorǵan aýdanyna qarasty Ábdiǵappar aýylynda turamyn. Otbasymda on adambyz. Atam Saıdbattal, ájem Kúlimhan bizge únemi aqylyn aıtyp otyrady. Ákem Ábdiqadyr «Horasan-1» kenishinde operator bolyp jumys isteıdi. Anamnyń esimi - Raıhan. Ol kisiler bes ul, bir qyz tárbıelep otyr.
Qolym bos kezde án aıtýmen aınalysamyn. Sondaı-aq, ulttyq oıyndarǵa da jaqyndyǵym bar. Bizdiń óńirde kókpar sporty jaqsy damyǵan. Aýylda jıi ótkizilip turatyn kókpar oıynyna qatysamyn.
- Jarysta jeńiske jetseń , alǵan aqshańa ne isteısiń?
- Bas júldeni jeńip alsam, ákeme kólik mingizsem degen maqsatym bar. Al anama qundy syılyq syılar edim.
Eske salsaq, budan buryn Qyzylorda oblysy Aral aýdanynyń turǵyny Aqberen Qýandyqov jaıynda jazǵan edik.
«Qazirgi kúni sergektikti serik etýge qolaıly jaǵdaı bar. Aral aýdanynda jergilikti turǵyndarǵa arnalǵan ortalyq stadıon men sekildi jastardyń jıi bas qosatyn ornyna aınaldy. Tirshilikten qolym qalt etken sátte sol jerden tabylýǵa tyrysamyn. Bul meniń kúndelikti qaǵıdama aınaldy. Aýdanda men sekildi azamattar sany az emes. Barlyq jerlesterimdi sportpen aınalysýǵa shaqyramyn», - deıdi ol.
Ádiljan Úmbet.
Foto Muhammedhan Saıdbattaldyń jeke muraǵatynan