Tartyl Fest: Aqtóbelik sportshy fınalda jeńiske jetse, anasyna kólik syılamaq
Qanat Bekbaýov qazir jas sportshylardyń jattyqtyrýshysy. Mektepten shyǵa sala sport keshenine asyǵatyn oqýshylardy úlken ómirge beıimdep júrgen bapker keshe ǵana oblystyq jarysqa baryp, ózi jattyqtyryp júrgen balalardy shyńdaı tústi.
Úıine oralǵan boıda aldaǵy josparymen, maqsatymen bólisti. Kishkentaıynan sportqa birtaban jaqyn bolǵan keıipkerimizdiń negizgi mamandyǵy - tarıhshy.
Tipti birneshe jyl mektepte tarıh páninen sabaq ta berdi.
«Muǵaljar aýdanynda ómirge keldim. №7 Embi qalalyq orta mektebinde oqydym. Orta mektepti támamdaǵan soń Q.Jubanov atyndaǵy Aqtóbe memlekettik ýnıversıtetiniń tarıh fakýltetine oqýǵa tústim. Qolyma dıplom alǵan soń Embidegi №1 mektepte tarıh páninen sabaq berdim. Keıin Embi qalasyndaǵy aǵaıyndy Jubanovtar mýzeıinde eńbek ettim. Qaıta oqýdy jón kórip, Q.Jubanov atyndaǵy Aqtóbe memlekettik ýnıversıtetiniń sport fakýltetine tústim. Eki jylda dıplom alyp, jumysymdy aýystyrdym. Qazir sport mektebinde gir kóterýden sabaq beremin. Mamandyq aýystyrýdyń óz sebebi bar. Mektepte er adamdar az, qaǵazbastylyq kóp. Biraq bala kúnderdegi armanym basym bolǵan sekildi. Qaıta aınalyp, ózim qalaǵan, armandaǵan salamdy taptym», - dedi Qanat Bekbaýov.
Embi qalasynyń týmasy oqýshy kezinde sport keshenderi bolmaǵanyn, biraq sonda da mekteptiń sport zalynda júrip-aq osy salanyń qyr-syryna qanyqqanyn aıtty. Boksty tańdap, rıngke de shyqty. Gir kóterip, toqtamǵa keldi. Qazir ózi jattyqtyrýshy ári sportshy. Barlyǵy 24 balany tárbıeleıdi.
«Ózim gir kóterý, qol kúresi, týrnıkke tartylýmen aınalysamyn. Oqýshylarymdy da osyǵan beıimdeımin. Paýerlıftıngten keshe ǵana jarysqa qatysyp keldik. Eki sportshynyń biri birinshi, ekinshisi úshinshi oryn aldy. Ózim de baq synap, ekinshi oryndy ıelendim. Al Tartyl Fest týraly aıtar bolsam, jarys týraly 15-shilde kúni estidim. Jarys 9-tamyz kúni boldy. 31-ret týrnıkke tartyldym. 18-30 jas aralyǵy 65-80 keli salmaǵy kategorııasynda úzdik shyqtym. Respýblıkalyq kezeńge daıyndyǵym jaqsy. Men qatysatyn kategorııanyń rekordy 50 eken. ıAǵnı, týrnıkke 50 ret tartylǵan. Ózim jattyqtyrýshymyn, ózim sportshymyn. Sondyqtan balalarmen birge jattyǵamyn. Sol jerde keshki saǵat 21:00-ge deıin júremin. Bul jarys ótti sátti uıydastyrylǵan. Ekiniń biri týrnıkke tartyla almaıtynyn bilemiz. Adamnyń bulshyq eti myqty shymyr bolýy kerek. Úlken motıvatsııa bolyp, qazir kishkentaı balalar da týrnıkke tartylyp júr. Bıyl uıymdastyrylsa qatysamyn dep qulshynyp júrgender kóp. Osylaısha biz sportty damytamyz», - dedi sportshy.
Embi qalasynda qazir eki sport mektebi bar. Balalardyń bos ýaqytyn tıimdi ótkizýine bar jaǵdaı jasalǵan. Úıirmelerdi tańdaýda shekteý qoıylmaıdy. Biri unamasa ekinshisin tańdaıdy. Al bir salaǵa dep qoıǵany túrli jarysqa qatysyp, sheberligin shyńdaıdy.
«Chempıon bolý mindet emes, adam bolý paryz. Sport - tárbıeniń kózi. Ol ortaǵa úırenedi, jyǵylyp, qaıta turýǵa mashyqtanady. Maqsatym jaqsy sportshy ǵana emes, maqtan bolar adam tárbıeleý», - dedi ol.
Qanat Bekbaýov - úıdiń kenjesi. Apasy, aǵasy bar. Ózi anasymen birge turady. Bar armany – anasyn baqytty etý.
«Ana bar syıǵa laıyq. Maǵan kólik týraly aıtqan emes, biraq ózim osyndaı syı jasaǵym keledi», -dedi ol.
Sportshy –jeti qyrly jigit. Oqýshy kezinde saz mektebindegi dombyra úıirmesine qatysqan. Sálıma Aldabergenqyzynan bes jyl boıy dáris alǵan. Qazir Embi orkestriniń múshesi. Kez kelgen mádenı sharaǵa qatysady.
«Aǵaıyndy Jubanovtar mekeninde dúnıege kelgen adam dombyra tarta bilýi kerek dep oılaımyn. Qyzyǵyp, úırengenmin. Qazir maqtan etemin. Sonymen birge tarıh salasy da qyzyqtyrady», - dedi Q.Bekbaýov.
Aıta keteıik, Qanat Bekbaýov ártúrli jyldary Muǵaljar aýdandyq halyq oıyndarynda gir kóterýden, gir sportynan oblystyq chempıonatta gir kóterýden, klassıkalyq jáne ekıpırovkalyq, jatyp syǵymdap kóterýden erler jáne áıelder arasynda ótken oblystyq chempıontta ziltemir kóterýden, oblystyq gir sporty uzyn tsıkl túrinen ótken chempıonatta gir kóterýden birinshi jáne ekinshi oryndardy ıelengen. Áli talaı belesti baǵyndyrmaq nıette.