Tartyl Fest: Aqtóbede bir otbasynyń úsh balasy jarysqa qatysty
«DARA» daryndylardy qoldaý qory uıymdastyrǵan festıval QR Tuńǵysh Prezıdenti atyndaǵy ortalyq saıabaqta ótip jatyr.
Uıymdastyrýshylardyń biri Erkin Tashevtiń aıtýynsha, onlaın tirkelgeni 500-ge jýyq bolsa, naqty salmaq ólship, alańǵa kelgeni 400-ge jýyqtaıdy.
«Jasyna, jynysyna qaramastan kez kelgen adam bul festıvalǵa qatysyp, baǵyn synaı alady. Qazirgi kezde rekord Aqtaý qalasynyń turǵynana tıesili. Ol 44 ret tartyldy. Aqtóbelikter de óte belsendi. Tańerteń tirkeý 9:00-den bastalsa, oǵan adamdar 07:30-dan bastap keldi. Kóbi jumys bastalmas buryn jazylyp ketýdi oılady»,- dedi Erkin Tashev.
Aqtóbedegi sport festıvaline qala ákimi Ashat Shaharov qatysyp, buqaralyq sportty damytý jolyndaǵy jumys jaıyn aıtty.
«Qalada jyl saıyn 50-60 alań paıdalanýǵa beriledi. Bul jastardyń sportpen aınalysýyna arnalǵan múmkindik»,- dedi Ashat Shaharov.
Aqtóbe oblystyq dene shynyqtyrý jáne sport basqarmasynyń basshysy Evgenıı Gorcharovtyń aıtýynsha, birneshe jyl buryn qalada nebári 30 alań bolsa, sońǵy bes jylda 100-den astamy salyndy. Bıyl taǵy 50-i qoldanysqa beriledi.
Aıta keteıik, aqtóbelik qatysýshylar arasynda alǵashqylardyń biri bolyp bir úıdiń úsh balasy shyqty. Olardy alańǵa anasy Alma Jarmanova ertip keldi.
«Ózim dzıýdomen shuǵyldanamyn. Kúıeýim de sportshy. Balalarym da dzıýdo, sýda júzý jáne túrli bıiktikten sekirý úıirmesine qatysady. Bizdiń bes balamyz bar. Búgingi jarysqa qyzym men eki ulym qatysty. Olar daıyndaldy»,-dedi ol. Jarysqa qatysqan 11 jastaǵy Nurahmet Jubatqan osy festıvalda jeńiske jetip, aldaǵy kúnderi anasynyń týǵan kúnine syı jasaýdy armandaıdy.
Aıta keteıik, saıabaqqa jınalǵandar, sondaı-aq Kalifarnya usynǵan kontsertti tamashalaı alady.
Eske salaıyq, «Tartyl Fest» týrnıkte tartylýdan respýblıkalyq sport festıvali Qonaev qalasynda bastalǵan bolatyn.
Keıin Túrkistanda, Taldyqorǵan, Almaty, Taraz, Shymkent, Aqtaý, Qyzylorda, Atyraý qalalarynda jalǵasyn tapty.
Ár qaladaǵy júlde qory: 1-oryn – 200 myń teńge; 2-oryn – 100 myń teńge; 3-oryn – 50 myń teńge.
Grand-fınal elordada 8 qyrkúıek kúni ótedi. Onyń júlde qory: 1-oryn – 3 mln teńge; 2-oryn – 2 mln teńge; 3-oryn – 1 mln teńge.