Tarıhyn bilmegen ulttyń bolashaǵy bulyńǵyr - Aıan Yqylas

ASTANA. QazAqparat - Elbasy Nursultan Nazarbaev «Uly dalanyń jeti qyry» atty maqalasy arqyly úshinshi myńjyldyq tabaldyryǵynda álemdik geografııadaǵy «jańa el» - Qazaqstannyń ejelgi shyǵý tegin, tamyryn kúlli álemge pash etti. Mundaı pikirdi  «Nur Otan» partııasy Strategııalyq bastamalar ınstıtýtynyń aǵa sarapshysy Aıan Yqylas bildirdi, dep habarlaıdy QazAqparat tilshisi.

«Tamyry sonaý ejelgi zamandardan bastaý alatyn Qazaq eli ár dáýirde de uly oqıǵalar men jańalyqtardyń ortasynda bolyp, álem, adamzat tarıhynyń damý kezeńderin bastan ótkerdi. Sonyń ishinde «tarıh aqtańdaqtary» dep atalyp ketken el basyna kún týǵan sonaý Aqtaban shubyryndydan bastap, HH ǵasyrdaǵy otarshyl saıasattyń saldarlary - asharshylyq pen repressııa  sııaqty zulmattardyń tarıhymyzda óshpes iz qaldyryp, halqymyzdyń damyp, órkendeýine edáýir tosqaýyl bolǵany anyq», - dedi ol.

Onyń ústine sarapshynyń atap ótýinshe, 70 jyldan astam sanamyzdy ýlaǵan otarshyldyq saıasaty tamyry tym tereńde jatqan Qazaq eliniń tarıhyn eýrotsentrıstik kózqarasta oqytyp, tól  tarıhyn umyttyrýǵa tyrysty. Elimiz táýelsizdigin  alǵannan keıin ǵana ótkenin jańǵyrtyp, tek Qazaqstan halqyna ǵana emes, kúlli álemge bultartpas dálelder men naqty oqıǵalarǵa negizdelgen shynaıy tarıhyn usyndy.

«Elbasy osy maqalasy arqyly aldaǵy ýaqytta kári qurlyq - Eýrazııanyń kindiginde ornalasqan, Uly Jibek jolynyń kúre tamyry, kúlli Túrki áleminiń ortalyǵy bolǵan Qazaq elin dúnıejúzilik sahnada jańa deńgeıde, ár qyrynan tanytý úshin qanshama jumystar atqarý qajettigin atap ótip, jańa mindetter qoıyp otyr. Tarıhqa súıensek, elimizdiń aýmaǵynda adamzattyń evolıýtsııalyq damýyna eleýli úlesin qosarlyq jańalyqtar - atty qolǵa úıretýden bastap, tas pen metaldan qarý-jaraq pen áshekeı buıymdar jasaý qolǵa alynyp, kórshiles elderge tarala bastaǵan», - dedi ol.

Aıan Yqylastyń paıymynsha, búginde álemge tanylǵan Qazaqstan memleketiniń arǵy negizi - ǵundar, saqtar men úısinder memleketi, beride qurylǵan Qazaq handyǵy bolsa, álemdik bilim men mádenıettiń oshaǵyna aınalǵan Otyrar, Syǵanaq, Saýran, Jankent, Taraz, Túrkistan sııaqty qalalarymyz bizdiń tek qana kóshpeli mádenıetti ǵana emes, otyryqshy mádenıetti de damytqandyǵyn dáleldeıdi.

«Jańa álemdegi jańarǵan Qazaqstan halqynyń aldynda ata-babalarymyz mura etip qaldyrǵan, ulan-baıtaq jerimizde damyǵan, órkenıetti elderdiń aldyńǵy legindegi memleketti qalyptastyrý maqsaty tur. Ol úshin osy kezge deıin elimizde júzege asyrylyp jatqan memlekettik baǵdarlamalar óz deńgeıinde júzege asyrylýy tıis. Sonyń ishinde tarıhymyzdy jańǵyrtý osyǵan deıin-aq «Mádenı mura» baǵdarlamasy negizinde qolǵa alynǵan bolsa, endi bul jumystardy aldaǵy ýaqytta Elbasynyń maqalasynda kórsetilgen baǵyttarda jańa serpinmen júrgizýimiz qajet», - dedi sarapshy.