Tarıhı jeńis: Ózbekstan basshysy paralımpıadashylardy marapattady

<p>TAShKENT. KAZINFORM &ndash; Ózbekstan prezıdenti Shavkat Mırzıeev XVII jazǵy Paralımpıada oıyndarynyń jeńimpazdary men júldegerlerin marapattady, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń Tashkenttegi menshikti tilshisi Álıhan Asqar.</p>

Ózbekstandyq sportshylar Parıjde ótken Paralımpıada oıyndarynda 26 medal jeńip alyp, tarıhı rekord ornatty. 

Foto: Ózbekstan prezıdentiniń baspasóz qyzmeti

«Sizder, bizdiń erjúrek ul-qyzdarymyz joǵary belesti baǵyndyryp, jarystyń naǵyz qaharmanyna aınaldyńyzdar. Ózbekstan komandasy 10 altyn, 9 kúmis, 7 qola medal jeńip aldy. Jalpy komandalyq esepte 13-orynǵa jaıǵassa, Azııada 3-oryn, túrki, ıslam jáne TMD elderi arasynda 1-orynǵa shyqty. Sportshylarǵa qajetti barlyq jaǵdaı jasaldy. Nátıjesinde bıyl Paralımpıada oıyndarynda 9 sport túrinen alǵash ret 65 sportshy el namysyn qorǵady», - dedi prezıdent.

Shavkat Mırzıeev bıyl tuńǵysh ret ózekbekstandyq velosportshylar Paralımpıadaǵa qatysqanyn atap ótti. 

Foto: Ózbekstan prezıdentiniń baspasóz qyzmeti

«Ózbekstannyń sport tarıhynda kóptegen jeńister bar ekeni belgili. Biraq Paralımpıada oıyndarynda mundaı rekordtyq jetistik eshqashan bolǵan emes. Mundaı jarqyn jeńis Ózbekstan jylnamasyna altyn áriptermen jazylady», - dep toqtaldy Ózbekstan basshysy.

Qosa ketsek, buǵan deıin Shavkat Mırzıeev Paralımpıada oıyndarynyń jeńimpazdary men júldegerlerin jáne olardyń bapkerlerin memlekettik nagradamen marapattaý týraly jarlyqqa qol qoıǵan edi. 

Foto: Ózbekstan prezıdentiniń baspasóz qyzmeti