Tarıhı tulǵalar qyzmetin baǵalaýdyń ǵylymı ádisnamasy ázirlenbek

ASTANA. QazAqparat – Elimizde alǵash ret «Tarıhı tulǵalar qyzmetin zertteý men baǵalaýdyń ǵylymı ádisnamasy» ázirlenedi. Mundaı ıdeıany Memleket tarıhy ınstıtýtynyń perspektıvalyq mindetterin talqylaý aıasyndaǵy jıynda ǵalymdar usyndy, dep habarlaıdy QazAqparat Ǵylym jáne joǵary bilim mınıstrligine silteme jasap.

«Mundaı ádisnamanyń qajettiligi Túrkistanda ótken Ulttyq quryltaıdyń ekinshi otyrysynda tarıhı sana-sezimdi jańǵyrtý basymdyǵynda aıtylǵan negizderden týyndap otyr. Bul jóninde Memleket basshysy Qasym-Jomart Toqaev «Ádiletti Qazaqstan – Adal azamat» atty sóılegen sózinde «Keıbir adamdardyń qalaýymen jalǵan ómirbaıany ádeıi qoldan jazylǵan Keńes dáýiriniń qaıratkerleri bar. Ondaı jasandy tulǵalardyń esimin túrli nysandarǵa berýdi doǵarý qajet… Osy saladaǵy barlyq rásimderdi is júzinde retteý mańyzdy. Onda aımaqtardyń ereksheligimen qatar, jalpyulttyq basymdyqtar da eskerilýi kerek» degen bolatyn. Sondyqtan da, qazirgi ornyqty damý turǵysynda tarıhı tulǵalardy baǵalaý mańyzdy», - dep jazylǵan mınıstrliktiń áleýmettik jelidegi paraqshasynda.

Instıtýt ǵalymdary atalǵan ádisnamany daıyndaýda «jergilikti, óńirlik jáne ulttyq» deńgeı boıynsha toptastyrýdy basshylyqqa almaq.

«Osyǵan deıingi 1992-2023 j.j. tarıh ǵylymy boıynsha qorǵalǵan dıssertatsııalarǵa nazar aýdarsaq, 772 dıssertatsııanyń 55-i túrli kezeńdegi tulǵalardyń qoǵamdyq-saıası qyzmeti, muralaryna arnalǵan. Degenmen de, qazirgi kún turǵysynda tulǵalardyń tarıhı shynaıylyǵyn qalpyna keltirý, táýelsiz Qazaqstandy qalyptastyrýǵa úles qosqan qaıratkerler týraly da paıymdalýy ulttyq otanshyldyq qundylyǵy men ózindik motıvatsııa bastaýynyń túrli kózderin keńeıtýge múmkindik beredi», - delingen aqparatta.