Tarıh kafedralaryn tarıhshylar ǵana basqarýy tıis - M. Tájın

ASTANA. 24 qyrkúıek. QazAqparat - Joǵary oqý oryndaryndaǵy tarıh kafedralaryn tarıhshylar ǵana basqarýy tıis. Búgin Aqordada ótip jatqan Ulttyq tarıhty zerdeleý jónindegi vedomstvoaralyq jumys tobynyń úshinshi otyrysynda QR Memlekettik hatshysy Marat Tájın osylaı málim etti.

Eske salaıyq, vedomstvoaralyq jumys tobynyń otyrysynda ýákiletti memlekettik organdardyń «Halyq tarıh tolqynynda» baǵdarlamasyn ázirleý jónindegi, sondaı-aq buǵan deıingi otyrystarda júktelgen mindetterdi iske asyrý barysy talqylanǵan bolatyn.

«Ekinshi otyrysta tarıh salasyna qatysty PhD doktorlary týraly másele kóterilgen bolatyn. Sonymen qatar taǵy bir másele biz joǵarǵy oqý oryndaryndaǵy tarıh kafedralarynyń ataýyn ózgerttik, endi mazmunyn da ózgertý týraly áńgime bolǵan edi. Jalpy tarıh kafedralaryn saıasattanýshy, ekonomıster nemese basqa da tulǵalar basqarmaýy kerek. Tarıh kafedrasyn tarıhshylar ǵana basqarýy tıis»,-dedi M. Tájın.

Osyǵan oraı Memlekettik hatshy Bilim jáne ǵylym mınıstrligine birqatar naqty tapsyrmalar júktedi.