Tarıftiń qymbattaýy: Qazaqstanda jylý jetkizýshi kompanııalar tekserile bastady

NUR-SULTAN. QazAqparat –QR Ulttyq ekonomıka mınıstrligi Tabıǵı monopolııalardy retteý komıteti azamattardan kelip túsken shaǵymdardan keıin eldiń birqatar óńirinde jylý energııasyn jetkizetin sýbektilerge qatysty jospardan tys tekserý bastady, dep habarlaıdy QazAqparat.

Málim etilgendeı, 2020 jylǵy jeltoqsanda kommýnaldyq tólem úshin túbirtekterde jylý aqysy ádettegiden joǵary kelgen. Osy oraıda, azamattardan ótinish-shaǵymdar túsken.

«Komıtettiń Nur-Sultan qalalyq departamenti jylý úshin negizsiz usynylǵan shotqa qatysty elorda turǵyndarynyń shaǵymdary negizinde «Astana-Teplotranzıt» JShS-ǵa tekserý júrgizdi.

Sondaı-aq, Qaraǵandy oblysy boıynsha TMRKD jylý energııasyn óndirýshi «Karaganda Energotsentr» JShS-ǵa qatysty tekserýdi bastady. Onda Qaraǵandy turǵyndaryna jylýmen jabdyqtaý qyzmetterin usyný sapasyna sýbektiniń qyzmeti tekseriletin bolady.

Qostanaı oblysynda da «Qostanaı JEK» MKK-ǵa qatysty jylýmen jabdyqtaýǵa usynylǵan shottardyń negizdiligi bóliginde tekserý bastaldy.

Qalǵan óńirlerde jylýmen jabdyqtaý úshin negizsiz shottar usyný turǵysynan jylýmen jabdyqtaý uıymdarynyń qyzmeti boıynsha tıisti jumystar júrgizilýde», - delingen QR UEM aqparatynda.

Atap ótilgendeı, Tabıǵı monopolııalardy retteý komıtetiniń departamentteri ótken jylǵy jeltoqsan aıynda syrtqy aýa temperatýrasynyń kóterilýine baılanysty sebepterden basqa, jylý úshin joǵary tólemder qoıý negizdiligine taldaý júrgizetin bolady.

«Tekserý qorytyndysy boıynsha Tarıftik retteýshi jylý berýshiler tarapynan qandaı da bir buzýshylyq anyqtalǵan jaǵdaıda, monopolısterge qatysty tıisti sheshim qabyldaıdy. Sondaı-aq halyqqa jylý úshin qaıta esepteý júrgizedi.

Budan bólek, Tabıǵı monopolııalardy retteý komıteti jyl saıynǵy negizde jylý eseptegish quraldary joq tutynýshylar úshin jylýmen jabdyqtaý qyzmetteriniń qunyn qaıta esepteýdi júrgizip jatqandyǵyn qosymsha habarlaımyz. Ótken jylytý maýsymynda tutynýshylarǵa 736,8 mln. teńge qaıtaryldy», - dedi mınıstrlikten.