Tarıfterdiń tómendeýi: Astanalyqtarǵa kelgen túbirtekte qandaı ózgeris bar

ASTANA. QazAqparat - Bıyl qańtar aıynan bastap elimizdiń barlyq aımaqtarynda kommýnaldyq tarıfter tómendeıdi degen jospar bar. Astana qalasynyń turǵyndary ótken aıdyń túbirtekterin ala bastady. Biryńǵaı tólem qujatymen birge kommýnaldyq tarıfterdiń ózgerýi týraly aqparat ta keldi, dep habarlaıdy QazAqparat tilshisi.

Túbirtekpen birge taratylǵan aqparatqa sáıkes, sýmen jabdyqtaý qyzmetiniń quny jańa jylǵa deıin bir tekshe metri úshin 46,21 teńge bolsa, bıyl qańtar aıynda 41,59 teńgeni qurady. Sol sııaqty sýdy burýdyń aqysy bir tekshe metri úshin 39,08 teńgeden 35,17 teńgege deıin tústi. Budan bólek, páterdiń jylýy Gkal úshin 2573,47 teńgeden 2318,1 teńgege tómendededi dep kórsetilgen. Atalǵan kórsetkish jalpy úıge arnalǵan eseptegish quraly bar páterlerge qatysty. Al ondaı quraly joq páterlerdiń jylý aqysy Gkal úshin 3097,67 teńgeden 2788,54 teńgege deıin túsip otyr. Jalpy, biryńǵaı tólem qujatymen birge kelgen aqparatta barlyq kommýnaldyq tarıfterdiń 10 protsentke tómendegeni kórsetilgen. Onyń ishinde elektr energııasy da bar. Biraq qatty tehnıkalyq qaldyqtardy shyǵarý 5 protsentke, al gaz qyzmeti 2 protsentke arzandap otyr.

Aıta keteıik, buǵan deıin QR Ulttyq ekonomıka mınıstrligi kommýnaldyq tarıfterdiń tómendeýine qatysty naqty esepti jarııalaǵan bolatyn. Ulttyq ekonomıka vıtse-mınıstri Serik Jumanǵarınniń aıtýynsha, aǵymdaǵy jyly 20 jeltoqsanǵa deıin birqatar óńirlerde kommýnaldyq tarıfter tómendetildi.

«Máselen, Aqmola oblysynda jylýdyń baǵasy bir sharshy metri úshin 116,1 teńgeden 73,4 teńgege (36,8 protsenke) tústi. Sol sııaqty Jambyl oblysynda sýmen jabdyqtaýdyń quny bir tekshe metri úshin 52,3 teńgeden 40,8 teńgege (22 protsentke) arzandady. Budan bólek, elektrenergııa, gaz ben sýdy burý qyzmetteride birshama tómendedi. Al kelesi jyldan bastap barlyq aımaqtardyń turǵyndary kommýnaldyq tarıfterdiń arzandaǵany baıqaıtyn bolady. Osylaısha, Almaty qalasynda ortasha aýdany 60 sharshy metrdi quraıtyn eki bólmeli páterdiń qazirgi tólemaqysy 14 483 teńge bolsa, kelesi jyldan bastap atalǵan tólem 13 128 teńgege tómendeıdi. Sóıtip, bir aıda 1 353 teńge únemdeledi. Sol sııaqty Astanada qalasynda eki bólmeli páterdiń kommýnaldyq tólemderi 10 666 teńgeden 9 604 teńgege deıin túsedi», - dedi S.Jumanǵarın Úkimet úıinde ótken baspasóz máslıxatynda.

Onyń sózine qaraǵanda, Shymkent qalasynda eki páterdiń ıeleri 1 340 teńgeni únemdese, Aqtóbeniń turǵyndary 1 068 teńgeni ózderine qaldyra alady. Óskemendikter - 313 teńgeni, tarazdyqtar - 806 teńgeni, oraldyqtar - 1 035 teńgeni, qyzylordalyqtar - 865 teńgeni, al Petropavl qalasynyń turǵyndary eki bólmeli páterdiń kommýnaldyq qyzmetterin 383 teńgege az tóleıdi.