Tarıfterdiń qymbattaýy jyldyq ınflıatsııaǵa qalaı áser etti

NUR-SULTAN. QazAqparat - Retteletin qyzmetterge belgilenetin tarıfter nelikten sharyqtap ketti jáne olardyń ósýi jyldyq ınflıatsııaǵa qalaı áser etti? QR UB Aqsha-kredıt saıasaty departamenti dırektorynyń orynbasary Denıs Chernıavskıı osy suraqqa jaýap berdi, dep habarlaıdy QazAqparat.

«Tutyný baǵasynyń ındeksin qalyptastyrý kezinde retteletin kommýnaldyq qyzmetter (sýmen jabdyqtaý jáne sý tartý júıesi, gazben jabdyqtaý, elektrmen jabdyqtaý, jylýmen jabdyqtaý) aıtarlyqtaı eleýli ról atqarady. 2021 jyly tutyný sebeti qurylymyndaǵy olardyń úlesi 6% boldy. Tıisinshe, tarıf dınamıkasy ınflıatsııaǵa tikeleı áser etedi, ıaǵnı, janama túrde – óndirilgen taýarlar men qyzmetter qunynyń ósýi arqyly yqpal etedi.

2018-2019 jyldary Qazaqstanda sol ýaqytqa deıin uzaq merzimdi tarıftik josparlarǵa engizilmegen kommýnaldyq qyzmetterdiń tarıfi edáýir tómendetilgen bolatyn. Bul jalpy ınflıatsııaǵa deınflıatsııalyq turǵyda áser etken qyzmetterge baǵanyń tarıhı azdap ósýine múmkindik berdi.

Alaıda retteletin qyzmetter baǵasynyń bir sáttik tómendeýi jáne olardy tómen deńgeıde saqtaý – keıinge qaldyrylǵan ınflıatsııa qaýpin týdyrýǵa, ıaǵnı, orta merzimdi perspektıvada tarıfterdiń jıi ári oqystan ósýine jol beredi.

Qazirgi tańda biz tarıf belgileýde teńgerimsiz saıasattyń saldaryn sezinip otyrmyz. Turaqty ınflıatsııa men qolaıly ekonomıkalyq konıýnktýra kezinde retteletin qyzmetterdiń tarıfin ákimshilendire tómendetýdiń arqasynda tabıǵı monopolısterdiń kirisi tómendedi.

Bunyń izin ala retteýshi memlekettik organdar shekti tarıfterdi arttyrýǵa májbúr boldy. Bıyl qarasha aıynda tarıfter jyldyq esepte 3,1%-ǵa ósti, eń kóp óskeni – elektr qýaty tarıfi (8,6%) men gaz tarıfi (5,5%)» dep atap ótti Denıs Chernıavskıı.

Onyń sózine qaraǵanda, sh ekti tarıfterdiń bir mezette aıtarlyqtaı qymbattaýy onyń aldynda alynbaı qalǵan kiristi eseptegende, ekonomıkada aıtarlyqtaı ınflıatsııalyq qysym jasap, qubylmaly ınflıatsııany arttyrady.

Solaı bola tura, koronadaǵdarys, sonyń ishinde, jahandyq ınflıatsııa men teńgegiń álsireýi saldarynan jaǵdaı odan saıyn qıyndaı túsedi.

«Óz kezeginde, tarıfterdiń ósimin keıinge shegerý arakidik ınflıatsııany shekti bekitilgen dálizge saı turaqty ınflıatsııa qalyptastyrýǵa kedergi jasap, Ulttyq Bank júrgizip otyrǵan saıasattyń tıimdiligin tómendetedi. Bul mańyzdy másele 2030 jylǵa deıingi Aqsha-kredıt saıasatynyń strategııasy aıasynda qozǵalǵan. Ulttyq Bank negizgi qarajatty jańartyp, baǵalardyń bir mezette qymbattaýynan bolatyn jaǵymsyz saldardy barynsha azaıtý úshin tabıǵı monopolııalardyń tarıfine shekti jyldyq ósim ornatý jón bolady dep sanaıdy. Qyzmetterdiń baǵasy baıaý ári boljamǵa sáıkes ósse, ol ınflıatsııalyq boljamdardy azaıtyp, jalpy ınflıatsııa deńgeıin kidirtýge múmkindik beredi» dep túıindedi spıker.