Tarıfter únemi óskenimen, kommýnaldyq qyzmet sapasy jaqsarmaı otyr - S. Áıimbetov
Depýtattyń aıtýynsha, tarıf máselesi ekonomıkaǵa da áleýmettik máselege de qatysy bar. «Bul is júzinde elimizdiń árbir azamatynyń múddesin qorǵaıdy. Májilis depýtattary óńirlerdi aralaǵanda saılaýshylar sapaly aýyz sýmen, jylýmen, elektrmen qamtamasyz etýge baılanysty másele kóterip, alańdaýshylyq bildirýde. Olardyń bizge joldaǵan hattarynda da osy máseleler aıtylady. Saılaýshylardyń pikirinshe, tarıfter únemi ósýde, biraq kommýnaldyq qyzmet sapasy jaqsarmaı otyr. Ókinishke qaraı, bul aşy da bolsa shyndyq», - deıdi depýtat.
Sonymen qatar, Elbasy Joldaýyndaǵy tutynýshylardyń quqyn qorǵaýdyń jańa júıesin qalyptastyrýǵa qatysty mindetke toqtalǵan S. Áıimbetov, osy salada memlekettik organdar qabyldaıtyn sharalardyń tıimdiligine keleńsiz áser etetin jaǵdaılar da bar ekenine nazar aýdardy. «Tutynýshylardyń quqyqtaryn qorǵaý salasyn ártúrli memlekettik organdar, ıaǵnı Básekelestikti qorǵaý agenttigi, tabıǵı monopolııalardy retteý agenttigi, memlekettik energetıkalyq qadaǵalaý komıteti jáne t.b. baqylaıdy. Osy saladaǵy ahýaldy taldaý nátıjesi joǵaryda atalǵan organdar arasynda qajetti ózara is-qımyldyń joqtyǵyn kórsetedi. Tutynýshylardyń quqyn qorǵaý jónindegi keshendi máselelerdi sheshýge baǵyttalǵan birlesken júıeli is-áreket bolmaı tur. Bizdiń oıymyzsha, tutynýshylar men qoǵamdyq uıymdardyń mindetti túrde qatysýymen barlyq memlekettik baqylaý organdary arasynda tıimdi ózara is-qımyl bolǵanda ǵana tutynýshylardyń múddeleri naqty qorǵalatyn bolady», - deıdi S. Áıimbetov. Bul rette depýtat tutynýshylardyń quqyn qorǵaýdyń keıbir tetikterine toqtalyp ótti.