Tarıfter boıynsha tutynýshylardyń múddelerin qorǵaıtyn ınstıtýt qurylady

ASTANA. QazAqparat - Tarıftik smetalar men ınvestıtsııalyq baǵdarlamalardyń oryndalýyn baqylaý úshin eki jańa ınstıtýt engiziledi. Bul týraly Parlament Májilisiniń jalpy otyrysynda «Tabıǵı monopolııalar týraly» zań jobasyn talqylaý kezinde QR Ulttyq ekonomıka mınıstri Tımir Súleımenov málim etti, dep habarlaıdy QazAqparat.

«Tabıǵı monopolııalar sýbektileri qyzmetiniń ashyqtyǵyn arttyrý jáne tarıftik smetalar men ınvestıtsııalyq baǵdarlamalardyń oryndalýyn baqylaýdy kúsheıtý maqsatynda zań jobasymen tıisti qadamdar kózdeledi. Birinshiden, 2 jańa ınstıtýtty engizý eskerilgen.

Osy oraıda Tarıftik saıasat jónindegi keńes jasaqtalady. Bul tabıǵı monopolııalar salalarynda memlekettik retteý saıasatynyń negizgi baǵyttaryn ázirleý jónindegi usynystardy talqylaıtyn jáne daıyndaıtyn konsýltatıvtik keńes organy. Tarıftik saıasat jónindegi keńes monopolısterdiń ınvestıtsııalyq baǵdarlamalary jobalaryn qarastyrady, sondaı-aq tabıǵı monopolııalar sýbektileriniń tarıftik smetalardy, ınvestıtsııalyq baǵdarlamalardy oryndaý týraly esepterin tyńdaıdy», - dedi QR Ulttyq ekonomıka mınıstri Tımýr Súleımenov

Onyń quramyna Parlament depýtattary, «Atameken» palatasynyń, qoǵamdyq birlestikterdiń ókilderi, táýelsiz sarapshylar jáne basqalar kiretin bolady.

Al ekinshi ınstıtýt tabıǵı monopolııalar sýbektileriniń qyzmetterin tutynýshylardyń qoǵamdyq birlestikterine qatysty.

«Bul monopolısterdiń qyzmetterin tutynýshylardyń óz quqyqtary men zańdy múddelerin qorǵaý maqsatynda qurylatyn kommertsııalyq emes uıym. Tutynýshylardyń qoǵamdyq birlestikteri tarıftik smetalardyń jáne ınvestıtsııalyq baǵdarlamalardyń oryndalýy týraly esepterdi qaraýǵa qatysady. Qyzmet tıimdiliginiń kórsetkishterine qol jetkizý jáne tabıǵı monopolııalar sýbektileri qyzmetteriniń sapa men senimdilik kórsetkishterin saqtaý týraly esepterdi qaraıdy. Sonymen qatar, ýákiletti, memlekettik organdarmen, tabıǵı monopolııa sýbektilerimen, sottarmen jáne basqa adamdarmen qarym-qatynasta  tutynýshylardyń múddelerin bildiredi. Munymen qosa, tabıǵı monopolııa sýbektileri qyzmetteri tutynýshylary atynan tutynýshylardyń quqyqtaryn qorǵaý týraly sotqa talap-aryz beredi», - dep naqtylady mınıstr.

Osy ınstıtýttardyń jumysy tutynýshylardyń qarajattaryn paıdalaný jáne usynylatyn qyzmetterdiń sapasy máselelerindegi monopolısterdiń qyzmetine baqylaýdy kúsheıtýge múmkindik beredi.

Budan buryn habarlanǵandaı, búgin Parlament Májilisiniń jalpy otyrysynda «Tabıǵı monopolııalar týraly» zań jobasy maquldandy. 

Esterińizge sala keteıik, jaqynda Aqordada Qaýipsizdik keńesiniń otyrysynda Memleket basshysy Nursultan Nazarbaev  kommýnaldyq qyzmetterge tarıfterdi zańsyz ósirgen tabıǵı monopolııalar sýbektilerin jazalaýdy talap etti.

Sonymen qatar Prezıdent Qazaqstanda elektr energııasy qunyn tómendetýdi tapsyrdy.