Tárbıeshilerdiń jalaqysy osy aıda 30%-ǵa arttyrylady

ASTANA. QazAqparat – Qyrkúıekten bastap mektepke deıingi tárbıe jáne bilim berý pedagogteriniń jalaqysy taǵy 30%-ǵa ósedi. Elimizde qazir 97 myń tárbıeshi bar, dep habarlaıdy QazAqparat Oqý-aǵartý mınıstrligine silteme jasap.

Jalaqyny jyl saıyn arttyrý 2020 jyldyń qańtarynan bastap Memleket basshysynyń tapsyrmasyna sáıkes júzege asyrylyp keledi.

Mektepke deıingi bilim berý júıesiniń kadrlyq áleýetin kúsheıtý maqsatynda 20 390 pedagog kásibı biliktilikterin arttyrady. 79 mektepke deıingi uıymda «Quzyret ortalyqtary» jumys isteıdi. Munda tárbıeshiler ózara tájirıbe almasyp, úzdik jumystarymen bólisedi.

Sonymen qatar, Úkimet balabaqshalarda jańa oryndar ashý boıynsha sharalar qabyldap jatyr. Jyl basynan beri 29 620 orynǵa arnalǵan 307 mektepke deıingi uıym paıdalanýǵa berildi. Jyl aıaǵyna deıin balabaqshalarda barlyǵy 81 myń, al 2025 jylǵa deıin 223 myń jańa oryn ashý josparlanyp otyr.