Tárbıelik máni zor Naýryzdy toılaýǵa erekshe nazar aýdarý kerek - Darhan Myńbaı

ASTANA. QazAqparat - Naýryzdyń mártebesin kóterýge mádenıet uıymdarymen qatar, ózge de salalar da úles qosýy tıis.

Bul týraly búgin elordadaǵy «Qazaq eli» monýmenti aldynda Naýryz meıramyna oraı uıymdastyrylǵan shara barysynda Qazaqstan Respýblıkasynyń Ulttyq mýzeıiniń dırektory Darhan Myńbaı málim etti.

«Naýryz merekesimen barsha Qazaqstan halqyn quttyqtaımyn! Osy ataýly merekeniń túp-tórkini tereńde jatyr ǵoı. Sondyqtan Naýryzdyń keńinen toılanyp, mazmuny tereńdeıtinine eshkimniń de kúmáni joq. Óıtkeni, osy kóktemgi meıram adamnyń tabıǵatpen ǵana emes, sonymen qatar ózi-ózimen , bir-birimen úılesetin kezi. Osy oraıda Naýryz saýapty, ımandylyq sharttary bar mereke dep bilemin, sebebi, adamdar ókpe-renishterin umytyp, qaıta qaýyshatyn, syılastyqtyń maqsatyn kózdeıtin ataýly mereke»,-dedi D. Myńbaı.

Bul turǵyda ol tárbıelik máni zor bolǵandyqtan Naýryzdy toılaýǵa erekshe nazar aýdarý kerektigin qadap aıtty.

«Osy merekeniń mártebesin kótere berýimiz kerek. Bul jerde tek mádenıet uıymdary ǵana emes, sonymen qatar ǵalymdar, ekonomıster, áleýmettanýshylar jáne ózge salalar úles qosýy kerek. Atap aıtqanda, Naýryz qazaq elin biriktire túsetin eń basty merekelerdiń biri dep bilemin»,-dedi D. Myńbaı.