Tarazǵa 120 aıaldama salynady

TARAZ. QazAqparat - Taraz qalasyn damytýdyń úsh jyldyq josparyna sáıkes, oblys ortalyǵyna 120 aıaldama ornatý josparlanǵan. Onyń bıyl 36-syn ornatý kózdelip otyr, dep habarlaıdy QazAqparat tilshisi.

Bul týraly Taraz qalasynyń ákimi Baqytjan Orynbekovtiń tóraǵalyǵymen ótken jıyn barysynda aıtyldy. Jańa formatta alǵash ret ótken basqosýda halyq qalaýlylary shahar basshysymen depýtattyq saýaldardyń oryndalý barysyn talqylady. Maqsat – qala ákimi men máslıhat depýtattarynyń arasynda tyǵyz baılanys ornatyp, turǵyndar máselesin tıimdi sheshý.

«Bıyl 36 aıaldama ornatý josparda. Onyń ishinde 6 aıaldama № 1 okrýgtiń aýmaǵynda ornatylady. Jalpy, alqap aýmaǵynda ornatýdy jáne aýystyrýdy qajet etetin 10 aıaldama bar. Qalǵan 5-i is-shara josparyna jáne bıýdjet bólinisine sáıkes qoıylady. Qalǵan 30 aıaldama da qajetti jerlerge ornatylady, – dedi qala ákimi.

Jıyn barysynda qalalyq máslıhattyń 27 depýtaty ózderi saılanǵan okrýgterdegi máseleler boıynsha suraqtaryn qoıyp, qla ákiminen naqty jaýaptaryn aldy. Máselen, depýtat Marat Jumanqulov ózi saılanǵan №1 okrýgtegi aıaldamalardyń tozyǵy jetkenin jáne shuǵyl jańartýdy qajet etip otyrǵanyn aıtty. Sonymen qatar, jol men jaıaý júrginshiler joly sekildi ınfraqurylymdyq qajettilikterge de toqtaldy.

Basqosýda bas-aıaǵy 100-ge jýyq saýal joldandy. Halyq qalaýlylary jol, sý, jaryq, káriz júıesin salý sekildi ınfraqurylymǵa qatysty máselelerden bastap, bilim nysandaryn jóndeý, shalǵaı alqaptarǵa júretin qoǵamdyq kólik sanyn arttyrý, «Oqýshylar saraıyn», balalarǵa oıyn jáne sport alańshalaryn salý, kóshelerdi jaryqtandyrý, kanaldardy tazalaý sekildi turǵyndar tarapynan túsken ótinish-tilekterdi qala ákiminiń nazaryna jetkizdi.

Buǵan deıin Tarazda taǵy 9 «aqyldy aıaldama» iske qosylǵanyn jazǵan bolatynbyz.