«Tarazdyń toıdan keıingi tirligi qandaı?» - baspasózge sholý
***
Marat Nurbekov elimizdiń ádilet, sot júıesindegi belgili esim. Sonaý Táýelsizdigimizdiń alǵashqy jyldary zań shyǵarýshylyq salasynda belsendi qyzmet atqarǵan bilikti zańger. Ol búgingi kúni zeınet demalysynda. Ýaqytynda Ádilet mınıstriniń orynbasary, birneshe oblystyq sottyń tóraǵasy qyzmetterin atqarǵan Qazaqstannyń qurmetti zańgeri Marat Nurbekulymen «Egemen Qazaqstan» gazeti tilshisi arasyndaǵy suhbat Táýelsizdiktiń alǵashqy jyldaryndaǵy sot-quqyqtyq reforma barysy týraly, búgingi kúnge júzege asyrylyp jatqan sharalar tóńireginde órbigen. Basylym tilshisine tuşymdy jaýap bergen ol: «Elimizde tuńǵysh ret zańǵa qol qoıý rásimi jarııaly túrde júrgizildi. Jańa zań azamattardyń jáne zańdy tulǵalardyń konstıtýtsııalyq quqyqtaryn, bostandyqtary men zańdy múddelerin sotta tıimdi qorǵaý, daýlardy qaraý men sheshýdiń tıimdiligin arttyrý, sot aktileriniń sapasyn qamtamasyz etý bolyp tabylady. Jańartylǵan Azamattyq protsestik kodeks «100 naqty qadam» Ult Josparynda aıqyndalǵan sharalardy iske asyrýǵa múmkindik beredi. Negizgi ázirleýshisi Joǵarǵy Sot bolyp tabylatyn jańartylǵan zańda azamattyq sot isin júrgizý mindetteri men qaǵıdalary jańa talaptarmen tolyqtyrylǵan. Kodeksti ázirleý kezinde shet memleketterdiń zańnamalary zerdelenip, jekelegen normalary nazarǵa alynǵan. Sondyqtan, jańartylǵan kodekstiń artyqshylyqtary kózge kórinip tur. Munda zańnyń ústemdigi joǵary qoıylǵan. Jańa Azamattyq protsestik kodeks azamattardyń jáne zańdy tulǵalardyń daýlarynyń tez jáne sózbuıdalyqqa salynbaı sheshilýine múmkindik beredi», - deıdi. Suhbat «Elimizde sot-quqyqtyq reforma sátti júrgizilýde» degen taqyryppen berilgen.
«Toı jasaýdyń bir jaqsy jeri tam-tasyńdy túzep, jóndep, áktep-kóktep, eski-qusqy dúnıeden qutylyp, jańadan jasanyp, bir silkinip qalasyń. Dál sol sııaqty kóne Taraz qalasy Qazaq handyǵynyń 550 jyldyq toıy qarsańynda totydaı taranyp, túrlenip, eńsesin bir tiktep aldy. Endi, mine, jas urpaqqa berer taǵylymy mol bolǵan dúbirli toı ótti», - dep jazady «Egemen Qazaqstan» gazeti senbilik sanyndaǵy «Tarazdyń toıdan keıingi tirligi qandaı?» degen taqyryptaǵy maqalasynda. Basylymnyń jazýynsha, qazir qalada 22 431 kásipkerlik sýbektisi tirkelgen. Onyń 17 288-i jeke kásipker, 5107-si shaǵyn jáne 36-sy orta kásiporyn sýbektileri. Shaǵyn, orta bıznes sýbektilerimen óndirilgen ónim kóleminiń úlesi 21 mlrd. 864 mln. teńgeni qurap, jalpy ónerkásip kásiporyndarymen óndirilgen ónimniń 12 paıyzyn qurapty. Taraz qalasynyń ákimi Nurjan Kalenderovtiń aıtýynsha, sońǵy jyldary bıznesti damytý úshin ákimshilik kedergilerdi joıý, memlekettik satyp alý rásimderin jetildirý, erkin básekelestikti ilgeri damytý, sondaı-aq, «Bıznestiń jol kartasy-2020» baǵdarlamasy aıasynda, qoldaý kórsetý boıynsha úlken jumystar atqarylýda. «Atap aıtar bolsaq, «Bıznestiń jol kartasy-2020» baǵdarlamasy aıasynda, 2015 jyly 3 mlrd. 438 mln. teńgege 69 joba qarjylandyryldy. Onyń ishinde jeńildetilgen nesıe berý tetikteri boıynsha 3 mlrd. 303 mln. teńgege 62 joba, óndiristik ınfraqurylymdy damytý tetigi boıynsha 123,5 mln. teńgege 3 joba jáne jańa bıznes bastamalarǵa grant bólý tetigi boıynsha 11,7 mln. teńgege 4 joba iske asyrylýda. Bul jobalar arqyly qosymsha 300 jańa jumys oryndary ashyldy», - deıdi qala basshysy.
***
«Altaıdyń Qazaqstanǵa qarasty bóliginde Agartı órkenıetine tıesili jer astyndaǵy qala bar», - dep jazady «Ekspress K» gazeti «Gnomo sapıens» degen taqyryptaǵy maqalasynda. Elordalyq zertteýshi Ersaıyn Shyǵaevtyń basyna mundaı oı AQSh Ortalyq barlaý qyzmetiniń burynǵy agenti Edýard Snoýdenniń jer asty úńgirleriniń sheksiz júıesinde tirshilik etetin gnomdar jaıyndaǵy málimdemesinen keıin kelgen. E.Shyǵaev Altaıǵa saparlap, Agartı patshalyǵynyń belgilerin izdep kórmek.
***
«Erlan Jarmuhametovtiń jasy ne bári 23-te. Biraq, ol qazirdiń ózinde memlekettiń kómegimen aıaǵynan tik turǵyzǵan kásiporynǵa basshylyq jasaýda», - dep jazady «Kazahstanskaıa pravda» gazeti «Erlan voploşaet svoı plan» degen taqyryptaǵy maqalasynda. «Damý» kásipkerlikti damytý qory ony maqsatqa umtylǵysh jas retinde sıpattaıdy. Shyǵys Qazaqstan qaǵaz qaldyqtaryn qaıta óńdeý jumystary qolǵa alynbaǵan edi. Mine, dál osy isti Erlan qolyna alyp otyr. Búginde ol basqaratyn «Óskemen qaǵaz fabrıkasy» JShS-inde 16 adam jumys isteýde.