Tarazdyqtar latyn qarpimen dıktant jazdy
Oblystyq tilder basqarmasy atap ótkendeı, atalmysh is-shara Táýelsizdik merekesine oraı, sonymen birge latyn álipbıin is júzinde qoldanýǵa daǵdylaný maqsatynda uıymdastyrylǵan.
Taqyryby «Latyn grafıkasy - tilimizdiń jańa qozǵaýshy kúshi» atalǵan dıktantqa oblys ákimdigindegi basqarma qyzmetkerleri, jergilikti bólimderdiń mamandary, Tarazdaǵy birneshe mekteptiń oqýshylary qatysty.
«Sondaı qıyn boldy dep aıta almaımyn. Qazaq tili týraly, eldiń tarıhy, ataly sózder men maqal-mátelder qamtylǵan dıktant jazdyq. Áleýmettik jelide áńgimelesetin jastar onsyz da qazir latyn qaripterin erkin qoldanyp júr», - deıdi Jambyldaǵy №7-shi mektep-gımnazııasynyń oqýshysy Aısulý Baǵbanova.
Tilder basqarmasynyń mamandary aıtqandaı, dıktantty eń saýatty jazǵandarǵa syılyqtar tabystalmaq. Qazaq álipbıiniń latynǵa ótýin nasıhattaý maqsatynda aldaǵy ýaqytta oblysta birqatar is-sharalar reti josparlanǵan.
Eske sala keteıik, 2017 jyldyń 26 qazanynda Elbasy Nursultan Nazarbaev qazaq tilin kırıll álipbıinen latynǵa aýystyrý týraly Jarlyqqa qol qoıǵan bolatyn.
Bıylǵy jyldyń 23 maýsymynda elordada ótken Dúnıejúzi qazaqtarynyń V quryltaıynda Qazaqstan Prezıdenti Nursultan Nazarbaev: "Men ózimniń Joldaýymda bul máselede «2025 jylǵa deıin» dep meje qoıǵan bolatynmyn. Biraq ta ony soza berýdiń qajeti joq dep oılaımyn. Bizdiń ǵalymdarymyz tıisti áriptiń bizge kerek úlgilerin túrik jáne basqa latyn árpine kóshken Ázerbaıjan, Ózbekstan úlgilerine qarap otyryp, kemshilikterin eskere otyryp, bizge kerekti álippeni tańdap alýy kerek. Menińshe, qıyndyǵy joq. Sebebi, 1 synyptan bastap barlyq balalarymyz aǵylshyn tilinde oqıdy. Barlyq mektepterde aǵylshyn tili oqytylady. Olarda latyn árpi qoldanylady. Ósip kele jatqan urpaqqa onyń eshqandaı qıyndyǵy joq. Bizge de onsha qıynshylyǵy joq dep oılaımyn. Keıbir aǵaıyndardyń bizdiń shyǵarmalarymyz ne bolady dep qynjylatyny bar. Qazirgi ınternet zamanynda eshqandaı problema joq", - degen bolatyn.