Tarazdyq oqýshy banan men apelsın qaldyǵyn tyńaıtqysh retinde qoldanýdy usyndy

TARAZ. QazAqparat – Tarazdaǵy Nazarbaev Zııatkerlik mektebiniń 10-synyp oqýshysy Aıaýlym Ádilova jemis-jıdek qaldyǵynan aýyl sharýashylyǵyna qajetti organıkalyq tyńaıtqysh óndirýdi usyndy, dep habarlaıdy QazAqparat.

Jas ǵalym kúndelikti turmysta paıda bolatyn qaldyqtardy, sonyń ishinde banan men apelsındi tyńaıtqysh retinde qoldaný arqyly birqatar agrarlyq máselelerdi sheshýge bolady dep sanaıdy.

«Qazir kóbine ósimdik sharýashylyǵynda adam densaýlyǵy men qorshaǵan ortaǵa zııandy hımııalyq zattar qoldanylady. Oǵan balama retinde bıologııalyq tyńaıtqysh – banan men apelsın qaldyǵyn qoldanýdy usynamyn. Zertteý jumysymnyń barysynda túrli tájirıbeler jasap, oń nátıjelerge qol jetkizdim», – deıdi Aıaýlym.

Jas zertteýshi hımııa pániniń muǵalimi Elmıra Ákimovanyń jetekshiligimen tájirıbeler jasap, atalǵan organıkalyq qaldyqtardyń paıdaly elementterge baı ekendigin jáne sharýashylyqtaǵy tıimdiligin anyqtaǵan.

«Aıaýlym sáýirde ótetin «Hımık-zertteýshi» ІII Halyqaralyq úzdik ǵylymı joba saıysyna shaqyrtý aldy. Elimiz pandemııany eńserip, karantın aıaqtalsa, mindetti túrde jarysqa qatysamyz. Qazir oqýshym ekeýmiz kúndelikti Skype arqyly sóılesip, jobany damytý ústindemiz», – degen ustaz shákirtinen úlken úmit kútetinin jetkizdi.