Tarazdyq bozbala áskerge barý úshin 20 kelige aryqtaǵan

ATYRAÝ. QazAqparat – Atyraýdaǵy áskerı bólim sarbazy Qarýly Kúshter qataryna shaqyrylý úshin 20 kelige aryqtaǵan, dep habarlaıdy QazAqparat.

Byltyrǵy jeltoqsanda Taraz qalasynan Qarýly Kúshter qataryna shaqyrylǵan Nıkıta Shevınniń boıy – 1 metr 99 santımetr. Aıaǵyna 47 ólshemdi etik kıedi.

«Taraz qalasynyń temirjol kolledjinde arnaıy orta bilim alǵan. Kolledjde oqyp júrgende áskerge barýly oılana bastadym. Biraq, byltyr jazda áskerge shaqyrý pýnktine kelgenimde mende artyq salmaq aýyr edi. Sol kezdegi salmaǵym – 140 keli. Bul áskerge barýyma kedergi boldy. Sóıtip, oqýymdy jalǵastyra berdim. Qazir áskerı boryshymdy munaıly shahar – Atyraý qalasyndaǵy №5546 áskerı bólimde atqaryp júrmin. Byltyrǵy jeltoqsanda Taraz qalasynan merzimdi áskerı qyzmetke shaqyryldym», -deıdi Nıkıta Shevın.

Sarbazdyń aıtýynsha, artyq salmaqtan arylý úshin jattyǵýdy bastaǵan. Birneshe aıdan keıin 20 keliden astamǵa aryqtaǵan.

«Meniń boıym da, salmaǵym da mektepte júrgende tez ósti. Áskerı bólimde alǵashqy kúnder óte qyzyqty ótti. Munda bári maǵan kóńil aýdaryp, boıym men salmaǵym týraly qyzyǵýshylyq tanytty. Bul Tarazdan jolaýshylar poıyzyna minip, Atyraýǵa kele jatqanda bastaldy. Menimen aldymen №5546 áskerı bólimi komandıriniń tárbıe jáne áleýmettik-quqyqtyq jumystar jónindegi orynbasary, podpolkovnık Baıram Álıev sóılesip, ómirlik maqsatym týraly surady. Áńgime arasynda meniń salmaǵym men boıym jóninde de qozǵaldy. Salmaǵym 120 keli dep jaýap berdim», -deıdi ol.

Endi Nıkıta Shevın salmaǵynyń shamamen 90 kelige deıin tómendeıtinine úmitti bolyp otyr.