Tarazdyq balalar tanymal blogerge beınebaıan túsirip, kóleńkeli teatr qoıylymyn sahnalady
Rejısser Qýanysh Beısektiń bastamasymen uıymdastyrylǵan bul jobada tarazdyq jetkinshekter akterlik, rejısserlik, operatorlyq sheberlikti úırendi. Bir aptaǵa sozylǵan shara nátıjesinde balalar kóleńkeli teatr qoıylymy men tanymal bloger Jeńis Omarovtyń ánine beınebaıan túsirdi.
«Joba aıasynda jazda birinshi shyǵarylymyn jasadyq. Almaty oblysyndaǵy Jalańash aýylynda balalarǵa rejısserlik, akterlik, operatorlyq kýrstar ótkizdik. Balalar sheberlik saǵattyń qorytyndysy retinde tanymal ánshi Eńlikke beınebaıan túsirdi. Sol jobamyzdy jalǵastyryp, búgin biz Zheka-men birge«Kel, balalar, oqylyq» kúzgi shyǵarylymyn jasadyq. Onda biz bıge ıkemi bar balalardy Tarazdan iriktep alyp, olarmen birge kóleńkeli teatr jasadyq. Sondaı-aq jobadaǵy balalar jaıly derekti fılm túsirdik. Bul fılm jas balalar týraly bolǵanymen, eresekterge de arnalǵan dep oılaımyn. Sebebi biz óse kele balalyq shaqtaǵy armanymyzdy órbitemiz. Balalar kedergige jolyqsa, osy derekti fılmdi kórip, kúsh jınaıdy degen úmittemin», - dedi derekti fılmniń rejısseri Qýanysh Beısek.
Odan bólek, fılm rejısseri balalardyń qatysýymen derekti fılm basqa qalalar men aýyldarda da túsiriletinin aıtty.
Al jobaǵa qatysýshy balalardyń deni unatatyn isi boıynsha ózin synap kórip, tájirıbe alǵanyn jetkizdi. Sondaı-aq túsirilim barysynda jańa dostarynyń kóbeıgenin aıtady.
«Men túsirilim barysynda túıeniń jáne shabandozdyń rólin somdadym. Buǵan deıin akrobatıkaǵa qatystym. Sonymen qatar karate sektsııasyna da barǵanmyn, biraq kóp uzamaı odan shyǵyp kettim. Sebebi akrobatıkamen qatar alyp júrý múmkin bolmady. Bıyl jańa jylda akrobatıkadan Almatyda óner kórsetýim kerek edi. Onyń ishinde meni aspanǵa laqtyryp qaǵyp alatyn sát boldy. Daıyndyq barysynda akrobatıkalyq qımyldy durys jasamaı, nátıjesinde jattyqtyrýshylar meni sátti qaǵa almady. Saldarynan mıym shaıqaldy. Degenmen moıymaı, ózimniń súıikti isimmen aınalysýdy toqtatpadym. Osy jobada meniń akrobatıkamen aınalysqanym kómektesti. Jattyqtyrýshym Talǵat aǵaı maǵan úlken úmit artady. Meni únemi qoldaıdy. Óskende myqty akrobat jáne akter bolamyn. Men oǵan senimdimin», - deıdi 11 jasar joba qatysýshysy Álıhan.
Joba uıymdastyrýshylarynyń maqsaty – balalardyń súıikti isimen kásibı túrde aınalysýyna qoldaý bildirý, olardy óz armandaryna jetýine járdemdesý. Sol sııaqty balalardyń jańa dúnıeni úırenýge qushtarlyǵyn oıatý.
«Balalardy kóleńkeli teatr ónerine baýlýǵa qatysty maǵan usynys keldi. Basynda oılandym, sebebi bul ońaı sharýa emes, onyń ústine ýaqyt tyǵyz boldy. Nátıjesinde jobany qolǵa aldyq. Balalarǵa jańa dúnıege úıretý olardyń damýy úshin mańyzdy. Sonymen qatar kóleńkeli teatr bizde áli keńinen tanylyp, damı qoımaǵan. Bul ónerdiń jańa túri. Túsirilim barysynda balalarǵa jańa dúnıe úırenýdiń mańyzdylyǵyn aıttym. ıAǵnı oıyna alǵan nemese unaǵan dúnıemen aınalysyp, ony damyta túsken jón», - dedi kóleńkeli teatr kýrsynyń jetekshisi Olga Murtazına.
Onyń aıtýynsha, balalardy irikteýde qıyndyq týyndaǵan.
«Іrikteý kezinde aldymen balalardyń yntasy men qyzyǵýshylyǵyna mán berdik. Balalarmen jumys isteý, uıymdastyrý qıynǵa soqqan joq. Balalarmen tez tabystyq, olarda qyzyǵýshylyq boldy. Qyzyqty joba boldy», - deıdi ol.
Aıta ketsek,«Kel, balalar, oqylyq» jobasy Jusan Bank-tiń qoldaýymen júzege asyrylyp otyr.
«Bul Qýanysh Beısekovpen birge iske asyrylyp jatqan ekinshi jobamyz. Alǵashqy joba jazda Almaty oblysynyń Jalańash aýylynda uıymdastyryldy. Ekinshi jobany qolǵa alý ol kezde oıymyzda bolmaǵan. Alaıda alǵashqy jobanyń qoǵamǵa tıgizgen paıdasyn, oqýshylardyń erekshe qyzyǵýshylyǵy oıanyp, shyǵarmashylyqqa, ómir jolyn tańdaýǵa qulshynysy artqanyn kórgende, bul bizdi odan ári shabyttandyra tústi», - dedi Jusan Bank marketıng departamentiniń dırektory Dana Dúısekova.
Bank ókiliniń málimdeýinshe, aldaǵy ýaqytta atalǵan jobany jylyna eki ret túsirý jospary bar.
«Birinshi jumysymyz Jusan Bank-tegi baǵdarlamalaýshylardy da qyzyqtyra túsip, olar«Kel, balalar, oqylyq IT» dep atalatyn uqsas jobany júzege asyrdy. Aýylǵa baryp, eki kún boıy baǵdarlamalaýshy mamandyǵynyń qyr-syryn oqýshylarǵa úıretti. Bizdiń basty maqsat - kishkentaı qazaqstandyqtardyń shyǵarmashylyq mamandyqtarǵa qyzyǵýshylyǵyn oıatyp, ózin jańa baǵytta baıqap kórýlerine yntalandyrý», - deıdi bank ókili.