Tarazdyq ardagerler Jeńis kúnine oraı 150 myń teńgeden aldy
Taraz qalasy ákimdigi baspasóz qyzmetiniń málimetinshe, búgingi tańda oblys ortalyǵynda 39 soǵys ardageri men eki myńǵa jýyq tyl eńbekkeri bar. 2018 jyldyń mamyr aıyndaǵy málimetter boıynsha, Tarazda 68 ardager men 32 soǵys múgedegi turady. Olarǵa teńestirilgen adam sany - 1320 adam, odan bólek, 5 239 tyl eńbekkeri bar.
«Qala ákimdigi ardagerler máselelerine únemi kóńil bólip otyrady. Olarǵa biryńǵaı qosymsha tólemder de taǵaıyndalǵan. Jeńistiń 74 jyldyǵyn merekeleý barysynda ardagerler men soǵys múgedekteriniń shotyna qalalyq bıýdjetten 150 myń teńge, olarǵa teńestirilgen tulǵalarǵa - 30 myń teńgeden, tyl eńbekkerlerine - 30 myń teńge bólindi. Soǵysqa qatysqan azamattardyń jesirlerine 15 myń teńgeden berildi», - dedi qalalyq ákimdik.
Jyl saıyn qala ákimdigi tarapynan soǵys ardagerleriniń respýblıkalyq jáne oblystyq «Egemen Qazaqstan», «Kazahstanskaıa pravda», «Aq jol», «Znamıa trýda», «Jambyl-Taraz» basylymdaryna jazylýyna qarajat bólinedi.
Taraz qalasyndaǵy Jeńis kúnin merekeleý soǵys jyldarynda qaza tapqan batyrlar eskertkishine gúl qoıýdan bastalyp, «Erlik» memorıaldy keshenindegi «Qaharman ult - Bessmertnogo polka» sherýge ulasty.
Sherýdi aımaq basshysy Asqar Myrzahmetov bastap júrdi. «Erlik» memorıaldyq keshenindegi Máńgilik alaýǵa, Baýyrjan Momyshuly eskertkishine gúl shoqtary qoıyldy. Taraz qalasyndaǵy merekelik shara otshashýmen aıaqtaldy. Oblys ortalyǵyndaǵy merekege 11 myń qala turǵyndary men qonaqtary qatysty.
Aıta keteıik, 1941 jyly 400 myńǵa jýyq bolǵan Jambyl oblysy turǵyndarynyń 100 myńnan astamy soǵysqa attandy. 39 jambyldyq Keńes Odaǵynyń batyry atandy, 9 - Dańq ordeniniń ıegeri.
Avtor: Galına Skrıpnık