Tarazdaǵy teraktige – 10 jyl: Halyq qaharmany Ǵazız Baıtasovty eske aldy

TARAZ. QazAqparat – Osydan on jyl buryn 12 qarasha kúni Tarazda qyzmettik boryshyn oryndaý kezinde polıtsııa kapıtany Ǵazız Baıtasov kóz jumǵan bolatyn. Ol granata jarǵan terrorısti óz denesimen jaýyp, erlikpen qaza tapqan edi, dep habarlaıdy QazAqparat tilshisi.

Jyl saıyn bul kúni Halyq Qaharmanynyń jerlesteri batyrdyń erligin eske alyp, rýhyna taǵzym etedi.

B.Momyshuly atyndaǵy «Jeńis» saıabaǵynda Jambyl oblysynyń ákimi Berdibek Saparbaevtyń, QR Іshki ister mınıstriniń orynbasary Murat Baımuqashevtyń, Jambyl oblysy PD bastyǵy Janat Súleımenovtiń, batyrdyń týystary men ishki ister organdarynyń ardagerleriniń qatysýymen dástúrli eske alý sharasy ótti.

«Ǵazız Baıtasov qaýipti lańkesti ustaý kezinde erlikpen qaza tapty. Onyń erligi eshqashan umytylmaıdy. Elimizdiń Tuńǵysh Prezıdenti Nursultan Ábishuly Nazarbaevtyń Jarlyǵymen Otan aldyndaǵy erekshe qyzmeti, qyzmettik boryshyn óteýdegi erligi men janqııarlyǵy úshin Ǵazız Baıtasovqa «Halyq Qaharmany» ataǵy berildi. Eki jyl buryn Qazaqstan Prezıdenti Qasym-Jomart Toqaev Tarazda batyrdyń otbasymen arnaıy kezdesken edi. Bıyl osy saıabaqta polıtsııa kapıtanynyń eskertkishi ashyldy. Janyn aıamaı, Otan aldyndaǵy boryshyn abyroımen atqarǵan osyndaı batyrlarymyzdan jas urpaq úlgi alýy tıis. Elimizde árqashan beıbitshilik bolsyn!» – dedi oblys basshysy.

Murat Baımuqashev Ǵazız Baıtasovtyń esimi Qazaqstan tarıhynda altyn áriptermen jazylǵanyn basa aıtty.

«Bizdiń otbasymyz barsha qazaq halqyna, ásirese jambyldyqtarǵa, el basshylyǵyna, jergilikti bılikke, polıtsııa departamentine, Ǵazızdiń áriptesterine jáne ony eske alýshylarǵa úlken alǵys bildiredi. Sizder qıyn sátterde meni jáne meniń uldarymdy qoldap, qamqorlyq tanytyp, erekshe kóńil bólip kelesizder», - dedi batyrdyń jary Gúljamal Tájıeva.

Mıtıngke qatysýshylar Halyq Qaharmany Ǵazız Baıtasovtyń eskertkishine gúl shoqtaryn qoıyp, qyzmettik mindetterin atqarý kezinde qaza tapqan basqa da polıtsııa qyzmetkerlerin bir mınýt únsizdikpen eske aldy.

Budan bólek Ǵazız Baıtasovty eske alýǵa arnalǵan quqyq qorǵaý organdary arasynda voleıboldan chempıonat, onyń qaza tapqan jerinde ornatylǵan qaıta qalpyna keltirilgen eskertkish taqtanyń ashylýy, velosherý sekildi birqatar sharalar uıymdastyryldy.