Tarazdaǵy meshitke jaıǵasqan 100-den astam Arys turǵynyna bar jaǵdaı jasalǵan

TARAZ. QazAqparat - Arystaǵy apattan zardap shekkenderdiń birazy Taraq qalasyna kelip, oblystyq meshitke jaıǵasty. Olarǵa jergilikti bılik tarapynan barlyq jaǵdaılar jasalýda, dep habarlaıdy QazAqparat.

Aıta keteıik, Tarazǵa kelgen arystyqtardyń sany - 108. Onyń 69-y eresek adamdar, qalǵany balalar. Barlyǵy - 21 otbasy. Ortalyq meshitke jaıǵasqan olarǵa jergilikti bılik, qala turǵyndarynyń atsalysýymen barlyq qolaıly jaǵdaı jasap otyr. Bul týraly oblys ákiminiń baspasóz hatshysy Nuradın Raqaı Facebook áleýmettik jeli paraqshasynda málimdedi.

Oblystyq meshitke turaqtaǵan zardap shegýshilermen Jambyl oblysynyń ákimi Asqar Myrzahmetov júzdesip, hal-jaǵdaılaryn bildi. Óńir basshysy jarylystan dúrlikken júrtty sabyrǵa shaqyryp, bul barsha qazaqstandyqtar úshin aýyr jaǵdaı bolǵanyn jetkizdi.

Oblys ákiminiń tapsyrmasymen meshitke turaqtaǵan arystyqtarǵa qolaıly bolýy úshin óz aldyna jataqhana, monsha uıymdastyrylýda. Sondaı-aq, ystyq tamaq, ózge de turmysqa qajettilikterdiń bári qarastyrylǵan. Óńir basshysy Arystaǵy balalardy Jambyl oblysyndaǵy jazǵy lagerlerde demaldyrý úshin de qajetti sharalar qabyldanatynyn aıtty. Olarǵa munda Arystaǵy jaǵdaı bir jaqty bolǵansha qalaǵandarynsha turaqtaýlaryna bolady. Qajetti as-sý, medıtsınalyq kómek bári-bári tegin kórsetiledi.

«Sondaı-aq, keshe túnde ońtústik óńirdi betke alǵan jolaýshylar poıyzdary oqys oqıǵaǵa baılanysty Taraz qalasynyń temirjol beketinde ýaqytsha toqtap qalǵan bolatyn. Degenmen, Jambyl oblysynyń basshylyǵy 55 oryndy «Setra» markaly 10 avtobýs, 18 oryndy 10 shaǵyn avtobýsty daıyndap, dittegen mekenine jetýge asyqqan azamattar úshin bar jaǵdaı jasaldy»,-dedi Nuradın Raqaı.