Tarazdaǵy fosfor zaýytyndaǵy jarylystyń aldyn ala sebebi anyqtaldy

TARAZ. QazAqparat- Tarazdaǵy Jańajambyl fosfor zaýytynda (JJFZ) bolǵan oqıǵanyń aldyn ala sebebi ataldy, dep habarlaıdy QazAqparat.

3 tamyz kúni saǵat 11:30-da Jańajambyl fosfor zaýytynda konteınerlik tsısternadan sary fosfordy alý kezinde jarylys bolyp, eki qyzmetker zardap shekti. Oqıǵa «JJFZ» JShS qoımasynyń aýmaǵynda bolǵan. Fosfor zaýytyndaǵy jarylys faktisi boıynsha memlekettik organdar ókilderiniń qatysýymen komıssııa qurylyp, tergeý júrip jatyr.

Jambyl oblysy polıtsııa departamentiniń habarlaýynsha, Fosfor zaýytyndaǵy jarylys faktisi boıynsha polıtsııa organdary QR QK 156-baby 2-bóligi boıynsha qylmystyq is qozǵady (erejelerdi saqtaýdy uıymdastyrý jáne qamtamasyz etý boıynsha mindetter júktelgen adam jasaǵan qaýipsizdik tehnıkasy qaǵıdalaryn buzý saldarynan baıqaýsyzda zııan keltirýge ákep soqtyrǵan). Osy bap boıynsha jaza 300 AEK-ke deıin aıyppul salýdy nemese túzeý jumystaryn júrgizýdi nemese 75 táýlikke deıin qamaýǵa alýdy kózdeıdi.
Eńbek ınspektsııasy basqarmasymen birlesip alǵashqy tergeý áreketteri júrgiziledi. Tergeý barysy baqylaýǵa alyndy.
Oqıǵanyń aldyn ala sebebi retinde qaýipsizdik erejelerin saqtamaý kórsetilgen.
Sary fosfordyń jarylýy kezinde zardap shekken 26 jáne 32 jastaǵy zaýyt jumysshylary dereý Taraz qalalyq kópsalaly aýrýhanasynyń reanımatsııa bólimine jetkizildi. Dárigerler olardyń denesiniń 22%-y zaqymdanyp, jaǵdaıy aýyr ekenin aıtady. Fosfordyń termohımııalyq kúıigi tinderdi zaqymdap qana qoımaı, jalpy ýlanýdy týdyratyndyǵymen aýyr.