Tarazdaǵy eń úlken kóshe Nursultan Nazarbaev dańǵyly bolyp qaıta ataldy

TARAZ. QazAqparat - Taraz qalasynyń eń úlken kósheleriniń biri - Tóle bı dańǵyly endi Nursultan Nazarbaev atyndaǵy kóshe bolyp qaıta atalady.

Bul týraly sheshim búgin oblystyq máslıhattyń kezekten tys HHHIII sessııasynda bekitildi, dep habarlaıdy QazAqparat tilshisi.

Sessııany oblystyq máslıhattyń hatshysy Baǵlan Qarasholaqov júrgizip otyrdy. Mundaı usynys Taraz qalasy ákimdigi men máslıhatynyń birlesken sheshimi negizinde joldanǵan. Osyǵan oraı oblystyq ákimdik pen máslıhatynyń birlesken sheshimi oblystyq Qoǵamdyq Keńespen kelisildi.

Aıta keteıik, búgin Qazaqstan Prezıdenti Qasym-Jomart Toqaev Parlament palatalarynyń birlesken otyrysynda Tuńǵysh Prezıdenttiń esimin máńgilikke qaldyrý úshin oblys ortalyqtaryndaǵy negizgi kóshelerdiń birin Nursultan Nazarbaevtyń esimimen ataý týraly tapsyrma bergen bolatyn. Osyǵan oraı, Taraz qalasyndaǵy 6 shaqyrymdy quraıtyn Nursultan Nazarbaev kóshesi paıda boldy.

Jańa dańǵyldyń boıynda tuńǵysh Prezıdent saıabaǵy, «Máńgilik el» monýmenti, Q.Rysqulbekov atyndaǵy saıabaq, ortalyq «Dostyq» alańy, oblystyq qazaq drama teatry, ortalyq meshit jáne taǵy basqa birqatar mańyzdy nysandar ornalasqan.

Sondaı-aq, Tarazdaǵy Tashkent kóshesi Tóle bı atymen qaıta atalatyn boldy.