Tarazda jataqhanaǵa áli jylý berilmegen: sýyq bólmede otyrǵan stýdentter narazylyq bildirdi

<p>TARAZ. KAZINFORM &ndash; Birneshe kúnnen beri Taraz qalasynda jylý berý jumystary qarqyndy júrip jatsa da, M.Dýlatı atyndaǵy Taraz óńirlik ýnıversıtetiniń №2 stýdentter jataqhanasy áli kúnge ortalyq jylý júıesine qosylmaǵan.</p>

Bul jataqhanada 500 stýdent turyp jatyr. Sońǵy kúnderi Tarazda aýa raıy kúrt sýyp ketkendikten jataqhana bólmeleri óte sýyq. Tipti túngi mezgilde dalada muz qatyp qalyp jatyr. Sondyqtan stýdentter tarapynan jylýǵa baılanysty narazylyq týyndap otyr.

Joǵary oqý ornynyń jataqhanasy nege áli kúnge jylý júıesine qosyla almaı otyrýynyń sebebin Taraz qalasy ákiminiń keńesshisi Dáýlet Tólendiden suradyq.

«Munyń sebebi aryda jatyr. 2024 jyldyń 13 mamyrynda «TarazTransenergo» MKK-niń mamandary Nıetqalıev jáne Qoıgeldi batyr kósheleriniń qıylysyndaǵy jylý júıelerin tekserý barysynda TarÓÝ menshigine qarasty qubyrdyń jarylǵanyn anyqtaǵan. Dál sol kúni oqý orny basshylyǵyna qubyrdyń jarylǵanyn jóndeý týraly nusqama berilip, tipti, 29 mamyr kúni resmı hat ta joldanǵan. Alaıda kúni búginge deıin bul aqaýlar jóndelmegen. Osyǵan baılanysty bul nysandardy ortalyq jylý júıesine qosý múmkin emes bolyp otyr», - deıdi Dáýlet Tólendi bizben áńgimesinde.

Endi TarÓÝ ókilderiniń «TarazTransenergo» MKK mekemesimen kelisimshart jasasý jáne ýnıversıtettiń barlyq ǵımaratynyń jylý qubyrlaryn qysymmen tekserý týraly usynys jasalǵan. Dál qazir Taraz qalasyndaǵy barlyq nysanǵa jylý berilip jatqandyqtan «TarazTransenergo» MKK mekemesiniń jumysshylary túgeldeı osy sharýaǵa jumyldyrylǵan. Sondyqtan TarÓÝ ǵımarattaryna jylý berý jumystary 21 qazannan bastalady.

Aıta ketsek, biz buǵan deıin Tarazda áleýmettik nysandarǵa jylý berile bastaǵanyn jazǵan bolatynbyz.