Tarazda jarylystan qırap qalǵan 24 úı jóndelip, qaıtadan paıdalanýǵa berildi

TARAZ. QazAqparat – Baızaq aýdanynda zardap shekken 35 úıdiń 24-i tolyǵymen qalpyna keltirilip, paıdalanýǵa berildi. Onyń tórteýi - Úshbulaq, 12-si - Jibek Joly, segizi - Qaınar aýylynda. Qalǵan 11 úıdegi jumystar qarasha aıynda aıaqtalmaq, dep habarlaıdy QazAqparat tilshisi.

Qaınar aýylyndaǵy jumystardyń barysymen tanysqan oblys ákimi Berdibek Saparbaev qalpyna keltirilgen úılerdi aralap, turǵyndardyń oı-pikirin tyńdady.

Birlik kóshesiniń turǵyny Erjan Aıdarqulov baspanasynyń burynǵydan da jaqsaryp qalǵanyn jetkizdi.

«Sol kúngi oqıǵadan úıimiz qatty búlingen edi. Úı men qora-jaıdyń 50 paıyzy qırap qalǵan bolatyn. Jarylystan keıingi úshinshi kúni qurylysshylar kelip, úıimizdi qalpyna keltirý jumystaryn bastap ketti. Búgin mine, baspanamyzǵa qaıta oralyp, kóship jatyrmyz. Shynymyzdy aıtsaq, qýanyshymyzda shek joq. Úıdiń ishine taza aýyz sý kirip tur. Buryn qarjymyz bolmaı kógildir otynǵa qosyla almap edik. Ony da kirgizip berdi. Qora-qopsymyzdy rettep, sharbaǵymyzdy qorshap berýde. Basymyzǵa túsken qıyn sátte qoldaý kórsetken halyqqa, memleket, oblys basshylyǵyna aıtar alǵysymyz sheksiz», - deıdi úı egesi.

Turǵyndar Amangeldi Nádirbekov, Ashat Mámbetov te úıleriniń jańa keıipke engenin aıtyp, rızashylyqtaryn jetkizdi.

12 kásipkerlik nysannyń búginde úsheýi jóndelip, qaıta jumysyn bastaǵan. 9 nysanda qurylys jumystary qyzý jalǵasýda.

Qaıta jańǵyrtýdan ótken úıdiń barlyǵy bir sáýlettik úlgige keltirilgen. Qas beti sarǵysh, irgetasy qyzyl túspen boıalyp, shatyry qyzyl jabynmen jabylǵan.

Qaınar aýylyndaǵy kósheler tolyq jaryqtandyryldy. Elektr jelisi men baǵanalary jańartylǵan. Asfalt jabyny buryn ortalyq kóshede ǵana bolsa, endi barlyq kóshe asfalttalady.

«Oblys ákimi barynsha áleýmettik qoldaýlardy uıymdastyrýdy tapsyrǵan bolatyn. Osy turǵyda aýyldaǵy áleýmettik osal toptaǵy otbasylardy gazben qamtý jumystary júzege asýda. Tolyǵymen ortalyqtandyrylǵan taza aýyz sýmen qamtyldy. Áleýmettik kómek retinde bizdiń tarapymyzdan zardap shekken ár otbasyǵa 300 myń, kásipkerler tarapynan 200 myń teńgeden kómek kórsetildi. Ár oqýshy balaǵa 50 myń teńgeden berildi. Sonymen qatar, «Senim Baızaq» qoryna túsken qarjy esebinen turǵyndardyń qora-qopsysy qaıta qalpyna keltirilýde»,-dedi Baızaq aýdany ákiminiń orynbasary Qaırat Ismaıl.

Qurylys jumystaryna 12 merdiger, 200-e jýyq qurylysshy men 22 tehnıka jumyldyryldy.

Oblys ákimi qalǵan 11 úıdiń jumystaryn qarasha aıyna deıin tolyǵymen aıaqtaýdy tapsyryp, aýdan basshylyǵy men merdigerlerge naqty mindetter júktedi.

Budan soń Berdibek Saparbaev Jibek joly eldimekeninde bolyp, ondaǵy 150 oryndyq mektep qurylysymen tanysty.

Qurylysshylar eki qabattan turatyn ǵımarattyń irgetasyn quıyp, birinshi qabattyń qabyrǵasyn qalaý jumystaryn bastap ketken.

Merdiger – «Syrym Beleke» JShS.

«Jalpy nysandy jeltoqsan aıynyń sońynda tapsyrmaq nıettemiz. Qurylysqa negizinen jergilikti qurylys materıaldary paıdalanylýda», - deıdi JShS dırektory Elmurat Kúnibekov.

Oblys ákimi merdigerge qurylystyń bar talaptaryn saqtaý, otandyq ónimdi paıdalaný, sapa men merzimine aıryqsha nazar aýdarý kerektigin eskertti.