Tarazda jańa týǵan sábıdi 1,5 mln teńgege satqan akýsherlerge úkim shyqty

<p>Jambyl oblysynda perzenthananyń eki akýsheri jańa týǵan náresteni satqany úshin sotqa tartyldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Aıta keteıik, oqıǵa 2022 jyldyń qarasha aıynda bolǵan.

Jábirlenýshi júktilikti merziminen buryn toqtatý maqsatynda aýrýhananyń perzenthana bóliminiń akýsheri B-ǵa habarlasqan.

Qyzdyń júktiligin otbasynan jasyrǵanyn túsingen B. áriptesi ıÝ-dan bosanǵannan keıin balany satýǵa kómek suraǵan.

Óziniń qylmystyq nıetin júzege asyrý úshin (ıaǵnı bir top adammen aldyn ala sóz baılasý arqyly) akýsherler jábirlenýshini aldaý jáne senimin teris paıdalaný arqyly jańa týǵan náresteni bireýge 1,5 mln teńgege satqan.

Sottalýshylardyń kinási jábirlenýshiniń zańdy ókiliniń, kýágerlerdiń aıǵaqtarymen, saraptama qorytyndysymen jáne zattaı dáleldememen dáleldengen.

Jambyl oblysynyń kámeletke tolmaǵandar isteri jónindegi mamandandyrylǵan aýdanaralyq sotynyń bergen málimetine súıensek, prokýror sottalýshylardy 9 jylǵa bas bostandyǵynan aıyrýdy suraǵan.

Sottalýshylar kinásin ishinara moıyndaǵan.

Jalpy, atalǵan qylmys boıynsha Qylmystyq kodekstiń 135-baby 2-bólimine sáıkes 9 jyldan 12 jylǵa deıin bas bostandyǵynan aıyrý jazasy kózdelgen.

Qylmystyq jaýapkershilik pen jazany jeńildetetin mán-jaı retinde bir sottalýshynyń jas balalary bar ekeni eskerilgen.

Jasalǵan qylmystyń sıpaty men qoǵamdyq qaýip dárejesin, sondaı-aq QK 55-baby 2-bóliminiń talaptaryn eskere otyryp, sottalýshylar 8 jylǵa bas bostandyǵynan aıyryldy.

Úkim zańdy kúshine engen joq.

Eske sala keteıik, bıyl qańtarda Jambyl oblysynda jańa týǵan sábıdi satý faktisiniń joly kesilgenin habarlaǵan edik.