Tarazda jańa «Medıa ortalyq» ashyldy

TARAZ. QazAqparat – Taraz qalasy ákimdiginiń «Medıa ortalyǵy» kommýnaldyq memlekettik mekemesi ashyldy,- dephabarlaıdy QazAqparat tilshisi.

Ortalyqta áleýmettik jelidegi resmı paraqshalarǵa qala turǵyndarynan kelip túsken suraqtarǵa jaýaptar uıymdastyrylady. Sondaı-aq, ondaǵy mamandar Taraz qalasy jaıly medıa resýrstardaǵy aqparattyń mazmunyn saraptaýmen aınalysady.

Tek bul ǵana emes, munda respýblıkalyq BAQ pen ınternet resýrstarda ákimdik jaıly shyqqan aqparattarǵa turaqty monıtorıng júrgizýmen qatar, olardyń qorytyndysy boıynsha tıimdi usynystar daıyndalady. Buǵan qosa, ákimdik ımıdjin kóterýge baǵyttalǵan beınerolıkter men ınfografıkalar, bannerler ázirlenedi.

Medıa ortalyqtyń ashylýyna Taraz qalasy ákiminiń orynbasary Almas Sadýbaev, zııaly qaýym, BAQ ókilderi jáne SMM mamandary qatysty.

«Qala ákimi Aıtqazy Qarabalaevtyń tikeleı tapsyrmasymen osy ortalyq óz jumysyn bastap otyr. Ortalyqtyń mindeti halyqpen keri baılanys ornatyp, qala turǵyndarynyń kez-kelgen suraǵyna jaýyp berý jáne sonyń sheshimin tabý», — deıdi Taraz qalasy ákiminiń orynbasary Almas Sadýbaev.

Budan keıin ortalyqtyń lentasyn Qazaqstan jýrnalıster odaǵynyń múshesi, aqyn Ǵanı Álimqyzy men ardager jýrnalıst Amangeldi Nurpeıisov qıyp, sáttilik tiledi. Qonaqtarǵa mekeme jumysy tanystyryldy.

Medıa ortalyqtyń ǵımaratyna jóndeý jumystary júrgizilip, tolyq aıaqtalǵan. Munda qonaq qabyldaıtyn, arnaıy tikeleı efırge shyǵatyn stýdııa men montaj, aqparat jasalatyn arnaıy bólmeler bar. Barlyǵy qajetti quraldarmen jabdyqtalǵan.

Medıa ortalyqta 13 qyzmetker jumys isteıdi. Olardyń ishinde jýrnalıster, smm jáne beınequrastyrýshy mamandar bar.