Tarazda jańa áleýmettik dúkender ashylady
«Taraz» ÁKK» UK» AQ dúkenderinde áleýmettik mańyzy bar taýarlar azyq-túlik dúkenderine qaraǵanda arzanyraq satylýda. Aıtalyq, nan — 55 teńge, qaraqumyq jarmasynyń kelisi —315 teńge, qant — 190 teńge, pııaz — 55 teńge. Baǵalardyń tómendigine qaramastan, munda uzyn-sonar kezek joq.
«Biz az qamtylǵan otbasylarǵa kómektesemiz desek, ásirese oryndy durys tańdaýǵa kóńil bólýimiz kerek. Áleýmettik pavılondardyń sanyn 15-ke arttyrýdyń jolyn oılastyryńyzdar. Sonymen qatar, olardyń syrtqy dızaınyn da ózgertý kerek», — dep tapsyrdy Berdibek Saparbaev.
Budan soń oblys ákimi áleýmettik dúken janyndaǵy «Smart» sýpermarketine at basyn buryp, nannyń baǵasyna nazar aýdardy. Qazir bir bólke nan 83 teńgeden satylýda. Ótken aıda naýbaıshylar unnyń qymbattaǵanyn alǵa tartyp, nan baǵasyn 95 teńgege kótergen bolatyn. Alaıda, aımaq basshysynyń tikeleı aralasýymen áleýmettik mańyzy bar ónimniń baǵasy qaıta tómendetildi. Sórelerdi bir sholyp shyqqan Berdibek Saparbaev óńirde óndiriletin taýarlardyń az ekenine qynjylys bildirdi.
Sodan keıin ol taǵy bir áleýmettik pavılon bolýy tıis dúńgirshekke bas suqty. Biraq munda arzan taýarlar emes, syrtqy jaǵynda jazylǵan jazýǵa qaraǵanda, laǵman ázirleıtin oryn tur. Esigi tars jabyq. «Taraz» ÁKK «UK» AQ Basqarma tóraǵasy Oljas Qarjaýov dúńgirshektiń jabyq turǵanyna bir jylǵa jýyq ýaqyt bolǵanyn aıtty. Jaqyn arada pavılondy qalanyń basqa yqshamaýdanyna aýystyrý josparlanýda eken.
Al, «Korzınka» jelisiniń sýpermarketinde nan 78 teńgeden satylýda. Oblys ákimi s aýda ornynda óńirlik ónimderdiń bar-joǵyn tekserdi. Munda Merki irimshigi zaýytynyń aırany basqa óndirýshilerdiń uqsas taýarlaryna qaraǵanda 5-10 teńgege arzan.
«Jambyl oblysynda óndirilgen taýarlardyń úlesi jalpy kólemniń shamamen 35 paıyzyn quraıdy. Olardyń arasynda shujyq, sút, et ónimderi bar. Ár apta saıyn biz taýarlardyń qol jetimdiligin arttyrý úshin túrli aktsııalar ótkizemiz», — dedi dúken dırektory Qarlyǵash Satanova.
B. Saparbaev oblysta óndiriletin ónim kólemin ulǵaıtýmen qatar, baǵanyń negizsiz
kóterilmeýin qadaǵalaý qajet ekendigine nazar aýdaryp, qala ákimdigi men aýyl
sharýashylyǵy basqarmasyna naqty tapsyrmalar júktedi.