Tarazda Uly Jibek jolynyń jandanýy men tarıhı mańyzy talqylandy
Sharany Qazaqstan halqy Assambleıasy jáne Qazaqstan Respýblıkasynyń Prezıdenti janyndaǵy «Qoǵamdyq kelisim» respýblıkalyq memlekettik mekemesi uıymdastyrdy. Ǵylymı konferentsııa bastalmas buryn Áýlıeata óńirine kelgen mártebeli meımandar Qarahan kesenesi, Tuńǵysh Prezıdent saıabaǵy, Táýelsizdik memorıaly, «Qazaq handyǵy» monýmenti jáne Aısha bıbi, Babadja hatýn kesenelerine ekskýrsııa jasady. Budan keıin Kenen Ázirbaev atyndaǵy Jambyl oblystyq fılarmonııasy «Alataý» qazaq folklorlyq-etnografııalyq ujymynyń ónerin tamashalap, «Uly Jibek joly» atty kitap kórmesine qatysty. Atalǵan shara aıasynda Qazaqstan etnostarynyń qolóner kórmesi men «Jibek joly boıyndaǵy suhbat» atty fotokórme uıymdastyrylyp, LED ekran arqyly «Jibek joly boıyndaǵy suhbat» jobasy týraly túsirilgen derekti fılm kórsetildi.
Óz kezeginde «Jibek joly boıyndaǵy suhbat – 2019» halyqaralyq mádenıettaný jobasynyń ashylý saltanatyna elimizdegi belgili jazýshylar men ǵylym qaıratkerleri, sonymen qatar, Reseı, Qyrǵyzstan, Ózbekstan, Tájikstan, Túrikmenstan elderiniń jetekshi ǵalymdary, halyqaralyq sarapshylary, Qazaqstan halqy Assambleıasy Ǵylymı-sarapshylyq keńes músheleri, etnomádenı birlestikter men Assambleıanyń kafedralary qatysty.
Onda Qazaqstan Respýblıkasy Prezıdentiniń janyndaǵy «Qoǵamdyq kelisim» respýblıkalyq memlekettik mekemesiniń dırektory, tarıh ǵylymdarynyń doktory, professor Sattar Májıtov sóz alyp, bul jıynnyń maqsaty Uly Jibek jolynyń tarıhy men áleýmettik-mádenı turǵydan jańǵyrýyn saralaý, Orta Azııa memleketteri arasyndaǵy yntymaqtastyqty nyǵaıtý, ortaq mádenı jáne tarıhı qundylyqtardy saqtaý, órkenıetaralyq dıalogty damytý ekenin atap ótti.
Budan keıin Jambyl oblysy ákiminiń orynbasary Sulýshash Qurmanbekova Taraz shaharynyń tarıhy tereńde ekenin, san ǵasyrlar boıy ataqty ǵalymdardyń zertteýine arqaý bolǵanyn aıta kelip, kórnekti ǵalymdar men tanymal sarapshylardyń qatysýymen ótip otyrǵan konferentsııa jumysyna sáttilik tiledi. Jıyndy joba avtory, belgili mádenıettanýshy Murat Áýezov júrgizip otyrdy. Basqosý barysynda tarıhshylar Uly Jibek jolyn qaıta jandandyrý týraly oılarymen bólisti. Mádenı qundylyqtardy saqtaý máselesin talqylady.
Spıkerler barlyq qabyldanǵan sharalar týrızmdi damytýǵa, týrıstik marshrýttar qurýǵa jáne Ortalyq Azııa elderi arasyndaǵy yntymaqtastyqty nyǵaıtýǵa baǵyttalǵanyn atap ótti. Ózbekstan Respýblıkasynan kelgen shyǵystanýshy Aleksandr Djýmaev, Reseı ǵylym akademııasynyń Shyǵystaný ınstıtýtynyń professory, tarıh ǵylymdarynyń doktory Aleksandr Kadyrbaev, Qyrǵyzstan Respýblıkasynan kelgen tarıh ǵylymdarynyń doktory, Orta Azııadaǵy Amerıka ýnıversıtetiniń professory Cholpon Týrdalıeva, fılosofııa ǵylymdarynyń kandıdaty, Tájikstan Respýblıkasy, Moensho Nazarshoev atyndaǵy Horog memlekettik ýnıversıtetiniń qyzmetkeri Mýnıra Tavakalova sııaqty sheteldik ǵalymdar men Qurmanǵazy atyndaǵy Qazaq Ulttyq konservatorııasynyń professory Almıra Naýryzbaeva, «Alqa» mádenı qorynyń prezıdenti, Abaı atyndaǵy Qazaq Ulttyq pedagogıka ýnıversıtetiniń professory Alýa Tańjaryqova jáne ózge de tanymal ǵalymdar Uly Jibek joly tarıhy men Orta Azııa halyqtarynyń mádenıeti jóninde keńinen áńgimeledi. Sonymen qatar, suhbat aıasynda Uly Jibek joly elderiniń jas avtorlary arasyndaǵy Halyqaralyq ALQA ádebı baıqaýynyń tusaýkeseri ótti. Joba nátıjesi boıynsha beınefılm túsirý josparlandy.