Tarazda «Uly Dala órnekteri» atty kórme ashyldy

ASTANA. QazAqparat - Taraz memlekettik pedagogıkalyq ınstıtýtynda «Uly Dala órnekteri» atty shyǵarmashylyq jumystardyń kórmesi ashyldy. Bul týraly QazAqparat TarMPI-dyń Aqparattyq-ımıdjdik qyzmetine silteme jasap habarlaıdy.

Qazaqstan Respýblıkasynyń Táýelsizdiginiń 25 jyldyǵy men Taraz memlekettik pedagogıkalyq ınstıtýtynyń 50 jyldyǵy qarsańynda uıymdastyrylyp otyrǵan kórmege atalǵan oqý ornynyń professor-oqytýshylary men stýdentteriniń kartınalary men qolóner buıymdary qoıylǵan.
 

Kórmeniń negizgi maqsaty  - kópshiliktiń beıneleý ónerine kórkem qundylyq turǵysyndaǵy kózqarasyn qalyptastyrý jáne sýretshiler arasynda tájirıbe almasý. Sonymen qatar, jergilikti qylqalam sheberlerin qoldaý jáne kásibı beıneleý ónerin nasıhattaý, táýelsiz memleketimizdiń bolashaq jas urpaqtaryn kórkem bilim negizderi men kásibı baǵyttaǵy shyǵarmashylyq óner túrlerimen tanystyra otyryp, jas tulǵanyń boıyna mádenı kórkem qundylyqtardy sińirý jáne kórkem estetıkalyq tárbıe berý bolyp tabylady.
 

«Bıylǵy jyly elimiz Táýelsizdiginiń 25 jyldyǵyn atap ótýde. Bul aıshyqty kezeń bizdiń sara jol tańdap, berekeniń belesine bettegenimizdi dáleldep berdi. Árbir azamatyn balasyndaı baýyryna basqan ystyq Otanymyzdyń gúldenýine jol ashty. Halqymyzdyń atyn álemge áıgilep, mártebesin ósirdi. Halqymyzda «ótkenin umytqan óshkendiktiń belgisi, ótkenin eske alǵan óskendiktiń belgisi» degen qanatty sóz bar. Mine, bul turǵyda osy taqylettes sharalardyń mańyzy zor ekendigi beseneden belgili», -  deıdi is-sharany uıymdastyrýshylar.
 

Kórmede beıneleý óneriniń natıýrmort, peızaj, portret syndy janrlarynda salynǵan 50-den astam jumys qoıylǵan. Óner týyndylarynda avtorlardyń júrek jylýy men ónerge degen mahabbaty, egemendik jyldaryndaǵy Qazaqstannyń jetken jetistikteri keńinen oryn alǵan. Atap aıtqanda, Q.Nurbaıqyzynyń «Aısha bıbi», S.Tynysbaevanyń «Qazaq handyǵyna 550 jyl», A.Amanjoldyń «Sheber qoly», A.Neıfeldtiń «Bala besik», A.Janqojaevanyń «Karavan» jáne M.Aljanovtyń «Halyq óner tamyry» atty kartınalary tarıhtyń tereń qoınaýynan syr shertedi. Al, J.Turmahanovanyń «Báıterek tarıhy», Sh.Jumalıevanyń «Astana joly», G.Nurpashtyń «Ertegi álemi», J.Qılybaevanyń «Kóktem kóńili», A.Fıeshkanyń «Nejnost» taqyrybyndaǵy óner týyndylarynda egemen elimizdiń jetken jetistikteri men tolaıym tabystary kórkem beınelengen.
 

Kórmeniń ashylý rásiminiń sońy Taraz memlekettik pedagogıkalyq ınstıtýtynyń stýdentterinen quralǵan «Tomırıs» bı tobynyń kontserttik baǵdarlamasyna ulasty.

Kórmege qoıylǵan óner týyndylary eki apta boıy Taraz qalasynyń turǵyndary men qonaqtarynyń nazaryna usynylmaq.