Tarazda tegin bilim beretin jekemenshik gımnazııa ashyldy
Oblys ortalyǵynda «Arai Elite» jeke gımnazııasynyń resmı ashylýy ótti. Oqýshylar munda tegin bilim alady. Mektep «Abylaı-sana 2003» JShS jeke qarajaty esebinen salynǵan.
«Elbasy árdaıym jastardy bilimge umtylýǵa, maqsatqa jetýge jáne tabysty bolýǵa shaqyrady. El bolashaǵy – bilimdi jas urpaqtyń qolynda. Oblysymyzda zamanaýı mektepter sany jyl saıyn artyp keledi. Bizdiń mindetimiz – sapaly bilim berý, balalardyń jan-jaqty, shyǵarmashylyq turǵyda damýyna barynsha qolaıly jaǵdaı jasaý», - dedi Jambyl oblysynyń ákimi Berdibek Saparbaev.
Ol atalǵan kompanııa basshysy Arman Edilbaevqa kórsetken qoldaýy úshin alǵys aıtyp, bul áleýmettik jaýapkershilik bıznestiń óz jerlesterine jaqsy jaǵdaı jasaýynyń jarqyn mysaly ekenin atap ótti.
Seriktestiktiń qoldaýynyń arqasynda jaqyn mańda ornalasqan «ARAI» medıtsına ortalyǵyn qalpyna keltirý jumysy da aıaqtalýǵa jaqyn, ulttyq qundylyqtardy nasıhattaýǵa baǵyttalǵan «Anaǵa taǵzym» ortalyǵy boı kóterip jatyr.
Arman Edilbaev mektep dırektory Janna Mádimarovaǵa jańa oqý ordasynyń sımvolıkalyq kiltin saltanatty túrde tabystap, pedagogıkalyq ujymǵa tabys tiledi.
Búgingi tańda 1025 oqýshyǵa arnalǵan gımnazııada 367 bala bilim alyp jatyr. Óńir basshysy tehnıkanyń sońǵy úlgileri boıynsha jabdyqtalǵan kabınetterdi aralap, tanysty.
Mektep sportzal, májilis zaly, ashana, kitaphanamen qamtylǵan. Sondaı-aq, tynyǵýǵa arnalǵan arnaıy aýmaq ta nazardan tys qalmaǵan.
Ata-analar men oqýshylar jańa oqý ornynyna degen rızashylyqtaryn jetkizdi. Ǵımarattyń qabyrǵalary motıvatsııalyq jáne tanymdyq kartınalarmen bezendirilgen.
Kabınetter jaryq ári keń. Ár qabatta uldar men qyzdarǵa arnalǵan dárethanalar bar.
«Oqýshylar aǵylshyn tili men matematıkany tereńdetip oqıdy. Kabınetter zamanaýı tehnologııalarmen, ınteraktıvti taqtamen jabdyqtalǵan», - deıdi mektep dırektory Janna Mádimarova.