Tarazda Táýelsizdik kúnine oraı qaıyrymdylyq aktsııasy uıymdastyryldy
Jambyl oblysy ákimdigi mádenıet, arhıvter jáne qujattama basqarmasynyń qoldaýymen Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý maqsatynda Jambyl oblystyq orys drama teatrynyń ujymy «Júrekten júrekke» aktsııasyn jyl saıyn uıymdastyryp keledi. Dástúrli túrde ótkizilip turatyn aktsııa barysynda Aqyl-esi kem balalarǵa arnalǵan ınternat úıi, qulaǵy estimeıtin jáne nashar estıtin jandarǵa arnalǵan «Meıirim» mektep-ınternaty, múgedekterdi arnaıy túzetý mektep-ınternaty, sondaı-aq múmkindigi shekteýli balalardy saýyqtyrý ortalyǵymen Jastar múgedekter qoǵamynyń ókilderi jasaǵan týyndylarynan kórme uıymdastyrylyp, kópshilik nazaryna usynyldy.
«Teatrymyzda ótip jatqan «Júrekten júrekke» aktsııasy Qazaqstan Táýelsizdik kúnine arnalǵan. Ol «Rýhanı jańǵyrý» jáne «Múmkindigi shekteýli halyqtyń áleýmettik qorǵalmaǵan toptaryn ıntegratsııalaý jáne beıimdeý» memlekettik baǵdarlamalary aıasynda ótkizilip jatyr, - dedi «QazAqparat» HAA tilshisi Jambyl oblystyq orys drama teatry dırektorynyń orynbasary Valerııa Son. - Qala turǵyndary múmkindigi shekteýli jandardyń qoldan jasaǵan buıymdaryn satyp ala alýǵa múmkindik alǵan atalmysh kórme-jármeńkege belsendi qoldaý kórsetti. Bizdiń is-sharamyzǵa qatysqandardyń barlyǵyna alǵysymyz sheksiz».
Kórme jumystarynan bólek, qatysýshylarǵa Abaı atyndaǵy Jambyl gýmanıtarlyq kolledji men Taraz tehnologııalar jáne qyzmet kórsetý kolledjniń stýdentteri feıs-art ónerin usyndy. Oblystyq orys drama teatrynyń sahnasynda eresekter men balalarǵa Alekseı Sımýkovtyń «Ushatyn keme» ertegisi qoıyldy.
«Ertegi jelisi qaltasynda soqyr tıyny joq, biraq júregi mahabbat, qaıyrymdylyq pen meırimge toly Ivan týraly. Ón boıyndaǵy adamgershilik qasıetteriniń arqasynda ol aınalasyna adal dostar jınaı bildi», - dedi Valerııa Son.
Aktsııa sońy ártister men qonaqtar arasyndaǵy fotosessııaǵa ulasty.