Tarazda sybaılas jemqorlyq jasaǵan 7 adam bas bostandyǵynan aıyryldy

TARAZ. QazAqparat – Taraz qalasy №2 sotynda 2020 jyly atqarylǵan jumys qorytyndysy boıynsha onlaın brıfıng ótti. Brıfıng barysynda sot tóraǵasy Nızamıddın Jamashov sottyń eseptik kezeńindegi statıstıkasyn málimdedi, dep habarlaıdy QazAqparat tilshisi.

Spıkerdiń aıtýynsha, ótken jyldyń 12 aıynda sotqa 928 qylmystyq is tússe, onyń 890 qylmystyq isi qaralǵan.

Úkim shyǵarý arqyly 681 is qaralyp, 3 qylmystyq is medıatsııa arqyly aıaqtalǵan, taraptardyń tataýlasýyna baılanysty sotqa deıingi protsess barysynda 126 tulǵa boıynsha qylmystyq is qysqartylǵan.

«Esepti merzimde sottalǵan 729 tulǵanyń ishinde aıyppul túrindegi jaza sybaılas jemqorlyqqa qatysty emes isterdi qospaǵanda 130 tulǵaǵa taǵaıyndalǵan. Salynǵan aıyppuldyń jalpy somasy - 5 650 624 teńge. Óz erkimen tólengen aıyppul somasy — 1 543 516 tenge, sot oryndaýshylarmen tólengen aıyppul somasy 1 818 896 teńge, tólenýge tıisti aıyppul somasy - 1 111 200 teńge» deıdi sot tóraǵasy.

Sondaı-aq, ótken jyldyń 12 aıynda sybaılas jemqorlyq boıynsha 23 qylmystyq is túsip, barlyǵy qaralǵan.

Onyń ishinde 15 tulǵaǵa aıyppul túrindegi jaza taǵaıyndalsa, 7 tulǵa boıynsha bas bostandyǵynan aıyrylǵan.

Alty tulǵa boıynsha bas bostandyǵynan shekteý jazasy taǵaıyndalyp, 7 qylmystyq is qaralý ústinde.

«2020 jyldyń 12 aıynda sybaılas jemqorlyq qylmystary boıynsha 15 sottalýshyǵa aıyppul salý túrindegi jaza taǵaıyndalǵan, salynǵan aıyppuldyń jalpy somasy – 106 677 780 teńge, onyń ishinde tólengen aıyppul somasy – 74 177 780 teńge, tólenbegen aıyppul somasy – 32 mln 500 myń teńge»,-deıdi N. Jamashov.