Tarazda Prezıdent rezıdentsııasynyń ornyna oqý-saýyqtyrý ortalyǵy ashylady

TARAZ. QazAqparat - Taraz qalasynda ornalasqan Prezıdent rezıdentsııasy ákimdik qaramaǵyna berilip, onda balalarǵa arnalǵan «Móldir bulaq» oqý-saýyqtyrý ortalyǵy ashylady, dep habarlaıdy QazAqparat tilshisi.

40 oryndyq oblystyq «Móldir bulaq» oqý-saýyqtyrý ortalyǵyn ashýǵa 610,8 mıllıon teńge qarastyrylyp otyr. Bul týraly óńirlik kommýnıkatsııalar qyzmeti alańynda Jambyl oblysy ákiminiń birinshi orynbasary Nurjan Kalenderov aıtty.

«Jalpyǵa mindetti bilim berý qory esebinen kóp balaly jáne az kamtylǵan otbasylardan shyqqan 48 671 balany ystyq tamaqpen, kıim-keshekpen jáne jazǵy saýyqtyrý lagerlerimen qamtamsyz etýge 5,7 mıllıard teńge bólingen.

Az qamtylǵan otbasydan shyqqan 1-4 synypta oqıtyn 70 639 balany jáne mektepke deıingi mekemelerde tárbıelenetin 11 326 balany ystyq tamaqpen qamtýǵa 3 mıllıard teńgege jýyq qarjy qaraldy», – dedi sondaı-aq, Nurjan Kalenderov.

Sonymen qatar, ol 2020-2023 jyldary 44 myńǵa jýyq pedagogtiń jalaqysy 100 paıyzǵa, ıaǵnı 2 esege óskenin de málimdedi.

Aıta keteıik, buǵan deıin Tarazda oqýshy elektr energııasyn óndiretin joba oılap tapqanyn jazǵan bolatynbyz.